Capitol drivers gi-seminar

CEBU, Philippines - Mokabat sa 100 ka drayber sa Kapitolyo ang gipaubos sa reorientation training-seminar kabahin sa effective driving.

Ang Provincial Human Resource Management Office nga maoy nagpasiugda sa kalihukan nipahimangno sa mga drayber sa Kapitolyo sa kaimportante sa ilang trabaho. Ang maong seminar nagsilbi kining pahimangno sa mga drayber nga isip kawani sa gobiyerno kinahanglan i-update nila ang ilang kaugalingon sa basic traffic rules and regulations, defensive driving ug paglikay sa disgrasya sa kadalanan.

Isip mga drayber sa gobiyerno ang ilang mga tahas mao ang paghatud og mga empleyado ngadto sa field assignments lakip na sa volunteers ug dokumento ngadto sa mga lugar sa probinsiya.

Ang representante sa Land Transportation Office nga si Eduardo Catalya nipahimangno sa mga drayber nga kanunay gyud kining managana sa posibleng mahitabo sa karsada diin gawas sa ilang kinabuhi, dunay laing mga empleyado o ilang pasahero nga pwedeng maamong.

Si Vic Ross Caburnay nga representante usab sa LTO nihisgut kabahin sa Joint Administrative Order No. 2014-01 o Revised Schedule of Fines and Penalties for Violations of Laws, Rules and Regulations Governing Land Transportation.

Lakip sa maong balaud ang pagpamulta og P3,000 sa drayber kinsa mag-drive nga expired na ang driver’s license ug magmaneho nga walay driver’s license.

Ang magmaneho og sakyanan nga gigamit sa krimen diin kung makonbikto pabayron og P10,000 nga multa ug kompiskahon ang driver’s license niini.

Ang pagmaneho nga nakainom og ilimnong makahubog ug nigamit og ginadiling drugas duna usab kini silot.

Ang LTO nipahimangno nga ang mga drayber magbaton kini og disiplina sa kaugalingon aron malikay sila sa disgrasya lakip na ang ilang mga pasahero. (BANAT NEWS)