Balaud sa hospital ipa-display

CEBU, Philippines - Ipabutang na sa mga hospital sa Dakbayan sa Sugbo ang kopya sa balaud nga nagdili sa pagbalibad sa mga pasyente o pagpugong nga makagawas kung wala pa’y ikabayad.

Kini kung aprobahan ni Mayor Michael Rama ang ordinansahon nga gipasar sa konseho nga nagmando sa mga tambalanan sa pagbutang sa kopya sa Republic Act 9439 ug Republic Act 8344.

Ang RA 9439 nagmando nga dili did-an ang pasyente nga makagawas sa hospital tungod lang kay wala makabayad sa mga bayranan samtang ang RA 8344 magsilot sa mga hospital nga magdumili pag-atiman sa mga pasyente nga wala’y ika-downpayment.

Matud ni Konsehal Alvin Dizon nga maoy nangamahan sa ordinansa nga bisan sa balaud, may mga tambalanan nga wala nituman    niini.

Matud niya nga kinahanglan magbutang og poster sa sulod sa mga hospital ug mga medical clinics labot sa Section 1 ug Section 2 sa RA 9439 samtang ang Section 1 usab sa RA 8344.

Kini makatabang sa pagpahibawo sa katawhan sa ilang katungod isip usa ka pasyente.

Hinuon si Dizon nitataw nga dili maabusohan  sa mga pasyente ang balaud tungod kay walay labot niini ang mga anaa sa private rooms.

Gikonsulta usab ang mga hospital labot sa ordinansa.

Ang trabahante sa hospital nga makalapas sa mao nga ordinansa makamulta og P5 mil o mapriso gikan sa usa ngadto sa unom ka buwan.

Apil na usab kini sa requirement sa pag-renew sa business permit pinaagi sa City Health Department.

Ang City Hall ang  mobuhat sa mga posters aron pareho ug uniform ang tanan.

Matag tuig adunay P300 mil nga igahin sa City Hall aron sa pagbuhat og bag-o nga mga posters. (BANAT NEWS)