2 patay, 5 angol sa aksidente

CEBU, Philippines - Nangamatay ang amahan ug anak human sila madam-agi og bus samtang nagsakay og motorsiklo didto sa Barangay Looc, Santander kaniadtong Huwebes sa buntag.

Ang mga biktima nga sila si Modesto Juguilon, 52, ug 15-anyos niining anak nga si Aldrich, napasok ilawom sa Ceres bus. Taga Marikina City ang mga biktima ug nagbakasyon lang sa Santander.

Matud ni PO3 Noel Estender, assistant investigator sa Santander Police Station, nga ang amahan usa ka seaman ug mga usa ka bulan pa lang nga nauli gikan abroad.

Ang mga biktima paingon unta nga mobisita sa iyang igsuon sa Barangay Looc diha nga nahitabo ang aksidente. Samtang nagdagan ang gisakyan nilang motorsiklo, nagsunod kanila ang bus.

Pag-abot nila sa likuon nga bahin, moliko unta sa wala ang motorsiklo apan naabtan gyud kini sa bus nga gimaneho ni Rogelio Baran, 33, taga Oslob.

Ang mga biktima nakaangkon og grabeng mga samad sa ulo ug ubang parte sa lawas nga maoy nakaingon sa ilang kamatayon.

Mitahan ang drayber ngadto sa kapolisan human niya ikahatod sa grahe ang gimaneho niya nga bus.

Ang drayber gipasakaan na og kaso nga reckless imprudence resulting to double homicide kay wala makig-areglo ang asawa ug inahan sa mga biktima.

Samtang didto usab sa Moalboal, duha ka polis ang nangaangol sab human nadasmagan sa usa ka multicab ang motorsiklo nga ilang gisakyan didto sa Barangay Tuble kaniadtong niaging Huwebes sa hapon.

Sila si PO1 Jennis Lamosao ug PO1 Niño Ridaza nga sakop sa Moalboal Police Station paingon unta diay nga moresponde sa alarma sa bangga sa Barangay Saavedra.

Gumikan kay ang usa nila ka sakyanan gigamit man ug ang lain nila nga patrol car gipa-ayo, napugos ang duha ka polis nga magmotor nalang pagresponde sa aksidente, apan sila usab naaksidente.

Ang multicab nga nakadam-ag sa motorsiklo nga gisakyan sa duha ka polis gimaneho ni Victor  Sabac, 51.

Pangos sa tuhod ug mga bun-og sa lawas ra hinoon ang naangkon ni Lamosao samtang si Ridaza ang nakaangkon og bali sa bukton, ug gidala kini sa usa ka pribadong tambalanan dinhi sa siyudad.

Sa dakbayan sa Toledo, laing tulo ka tawo ang nangaangol human nibangga ang usa ka Toyota Innova sa likod nga bahin sa dumptruck didto sa Barangay Dumlog.

Ang naangol mao si Benjamin Apostol, 40, lumad nga taga dakbayan sa Davao ug laing duha niya ka kauban nga wala na lang ilha. Kasamtangan sila nga nagpuyo sa usa ka resort sa Barangay Bato, dakbayan sa Toledo.

Sa gihimong imbestigasyon sa Toledo City traffic section nasayran nga nag-una ang dumptruck nga gimaneho sa usa ka Armand Canonigo, 45, taga Barangay Balirong, Naga ug paingon unta sa Barangay Don Juan Climaco.

Nisuway unta pag-overtake ang gisakyan sa mga biktima apan nabangga kini sa likud sa dumptruck.

Daling gidala ang mga naangol sa usa ka tambalanan sa dakbayan sa Sugbo. (BANAT NEWS)