Mga kandidato gidid-an

CEBU, Philippines - Bisan kinsa, ilabi na ang mga kandidato ug ang ilang mga sakop, gidid-an na sa pagdirekta og pagpanghatag og mga hinabang ngadto sa mga biktima sa lainlaing katalagman sa dakbayan sa Mandaue.

Ang mga sakop sa Mandaue City  Disaster-Risk Reduction and Management Council, migama og lagda human nga ang pipila ka kandidato sa One Cebu Party nangunay pagpanghatag og hinabang sa mga nasunogan sa Barangay Mantuyong ug Guizo sa miaging semana.

Ang gatusan ka pamilya nga nasunogan anaa gipahimutang sulod sa compound sa Cebu International Convention Center (CICC) apan giadto sila ni Konsehal Lolypop Ouano-Dizon ug asawa sa laing kandidato nga nanghatag og hinabang.

Giklaro ni Lolypop nga nananghid silang daan sa buhatan sa Social Welfare sa dakbayan ug mitugot ra kini kanila nga manghatag og hinabang.

Si Comelec Officer Fluer Ann Gujilde miingon nga wala makahimo og kalapasan sila si Lolypop kay wala pa man usab magsugod ang adlaw sa kampanya sa mga lokal nga kandidato.

Ang bag-ong lagda mao nga ang pagpanghatag sa hinabang ipaagi na gayud sa incident command post ug sa mga authorized social workers.

Gidili na usab ang pagpundok sulod sa compound sa CICC uban sa mga kandidato ingon man ang paghimo og pasiuna nga koordinasyon sa incident command post aron mahan-ay ang oras sa pagpanghatag sa hinabang. Kapin sa 11 mil ka tawo ang nabiktima sa sunog nga miugdaw og mga 500 ka kabalayan. Sila gipanghatagan og mga banig, habol, sapot, tubig, pagkaon, kaldero, plato, kutsara, balde ug uban pa. (BANAT NEWS)