Dul-an P1M shabu nasakmit

CEBU, Philippines - Managsuong babaye nga gipasanginlang drug pushers diha sa Sitio San Miguel, Brgy. Lorega, Cebu City nadakpan atol sa buy-bust operation ug nakuhaan og gibanabanang P400 mil nga kantidad sa shabu.

Ang mga sakop sa Regional Anti-Illegal Drugs Special Operations Task Group-7 ug City Anti-Illegal Drugs Special Operations Task Group sa Cebu City Police Office mironda ug misikop nila ni Grace Legaspi, 47, taga Consolacion nga maoy target sa kapolisan lakip na ang iyang manghod nga si Ruth Opura, 36, taga Barangay Lorega.

Matud pa ni Senior Inspector Henrix Bancoleta sa RAIDSOTG-7 nga nahinabi sa Banat News  nga si Legaspi gipanid-an na kaniadto pa sa kapolisan sa Consolacion tungod sa pagpamaligya og drugas.

Magbisitahan usab kini kang Opura dinhi sa siyudad kay matud pa mao kini iyang kaabag sa pagpayuhot sa drugas.

Nakuha sa mga polis gikan sa managsuon ang usa ka dakong putos, usa ka medium ug 40 ka gagmay nga paketeng gituohang shabu.

Apan sa pakighinabi sa Banat News kang Legaspi, hugot kini nga mihimakak sa pasangil bisan pa man sa drugas nga nakuha gikan kaniya.

“Sayod ang Ginoo, mga silingan namo wala gyud ko ana, di gyud na akoa Sir, atubangon na lang namo na sa korte,” sumala pa ni Legaspi, samtang ang iyang igsuong si Opura nagsige og basol sa maguwang nga naduhig siya niini.

Sa laing operasyon , dul-an P600 mil nga shabu ang nasakmit sa kapolisan gikan sa usa ka  Diosdado Perez, 49, atol sa buy-bust operation sa Sitio Tabunok, Brgy. Maslog, Dakbayan sa Danao.

Si Police Officer 3 Roselo Campo sa Danao City Police miingon nga ang ilang hepe nga si Chief Inspector Fructuoso Lim maoy nangulo sa buy-bust operation  nga niresulta sa pagkasikop kang Perez.

Nakuha kaniya ang gibaligyang shabu ug dugang usa  ka medium size nga shabu ug lima ka gagmay nga putos niini.

Ang mga dinakpan pasakaan og kasong kalapasan sa Republic Act 9165 o Comprehensive Dangerous Drug Act of 2002. (BANAT NEWS)