Wala nay pagkaon

CEBU, Philippines - Ang mga pamilya nga nasunogan sa Barangay Basak, Mandaue City dili na hatagan og rasyon nga pagkaon sa Department of Social Welfare and Development (DSWD).

Apan gipasabot ni Konsehal Michael Ostia nga ang mga biktima sa sunog makadawat gihapon og mga food packs gikan sa DSWD, apan ang tagsa-tagsa ka pamilya na maoy moluto niini.

Hinuon, gipasalig ni Ostia nga dili nila pasagdan ang mga nasunogan.

"Dili gyud ni pasagdan sa barangay. Mangita gyud mi og resources aron dili sila madehado sa serbisyo,” matud sa konsehal.

Ang mga pamilya nga nasunogan nakadawat og mga banig, kaldero ug planggana. Adunay mga medical personnel nga naka-standby 24 oras sa maong lugar aron sa paghatag dayon og pag-atiman sa panginahanglan sa mga biktima.

Ang mga nasunogan makadawat usab og financial assistance gikan sa dakbayan sa Mandaue aron makatukod sila pagbalik og ilang panimalay.

Giklaro ni Ostia nga dili tinuod ang mga tabi-tabi nga i-relocate ang mga biktima gikan sa dapit nga nasunogan. Matud sa konsehal nga wala sila’y nadawat  nga mando gikan sa tag-iya sa maong yuta. (BANAT NEWS)