Dry-run kinahanglang sayuhon

CEBU, Philippines - Nihangyo si Lapu-Lapu City Mayor Paz Radaza nga himuon na karong semanaha ang dry run sa pagbiyahe sa mga ferry boats ug barges nga mokarga sa mga sakyanan gikan sa Dakbayan sa Lapu-Lapu paingon sa Ouano Wharf ug vice versa.

Si Radaza nakigkita sa general manager sa Cebu Port Authority (CPA) Edmund Tan aron hangyuon nga sulod ning semanaha himoon ang maong dry run. 

Ang maong mga barko maoy mokarga sa mga sakyanan, motor ug sa mga pasahero aron mamenusan kadtong mga moagi sa duha ka taytayan samtang giayo ang Mandaue-Mactan Bridge.

Gimanduan usab sa mayor ang Engineering Department nga paspasan ang gihimong pag-ayo sa dalan ug renovation sa dunggoanan  diha sa dakbayan apil na usab niini ang pagbutang og dugang suga.

Gusto niyang masuta pinaagi sa dry run kun adunay kinahanglang usbon o palambuon sa dili pa hingpit magsugod ang operasyon. Ang Maritime Industry Authority (MARINA) mitakda sa dry run sa Marso 5.

Gipatun-an na usab ni Radaza sa ilang legal officer ang mga legalidad nga himoon sama sa Memorandum of Agreement tali sa kagamhanan ug sa tag-iya sa pantalan ug hangtud kanus-a kini gamiton.

Samtang nimando na usab ang mayor sa barangay officials sa Brgy. Pajo nga abisohan na nga papahawaon kadtong mga nagtukod og mga balay ilawom sa Mandaue-Mactan Bridge nga dugay na unta nilang gipapahawa.

Nasayran nga adunay dul-an  80 ka pamilya ang maapektuhan sa maong kamandoan apan andam ang siyudad paghatag kanila og hinabang pinansyal. Sa laing bahin, ang buhatan sa Housing Urban Development Office (HUDO) sa Mandaue City nga gipangulohan ni Tony  Pet Juanico  uban sa mga opisyal sa DPWH-7 mohimo og ocular inspection sa mga panimalay ubos nga bahin sa maong taytayan.

Kini human nasayran nga posibleng dili lang 33 ka balay ang demolison tungod kay kinahanglang maghimo og dalan diha sa lugar sumala pa ni Roger Paller, Public Information Officer (PIO) sa maong siyudad.

Si Paller miingon nga gipaningkamutan sa HUDO nga mahatagan gayud og hinabang pinansiyal ang maapektahan. (BANAT NEWS)