Pamilyang Oyao nasagmuyo sa bansag nga “Oyao Drug Group”

CEBU, Philippines - Pinaagi sa usa ka abogado, nireklamo ang pamilyang Oyao sa paglambigit sa ilang pangalan tungod kay gi-label sa Police Regional Office (PRO)-7 nga ang napatay nga gidudahang kriminal niadtong adlaw’ng Domingo sakop sa “Oyao Drug Group.”

Nidangop og abogado ang pipila ka mga sakop sa pamilyang Oyao sa dakbayan sa Lapu-Lapu kay matud nila dili makiangayon ang pagtawag sa kapulisan nga “Oyao Drug Group.”

Niadtong adlaw nga Domingo, napatay sa kapolisan si Joel Oyao Amistad sa Brgy. Agus sa Siyudad sa Lapu-Lapu.

Si Amistad maoy gitumbok nga mipusil-patay kang Police Officer 3 Antonio Inihao Jr. ug niangol sa backup niining polis nga si PO3 Jasper Nuñez niadtong  Sabado.

Si Atty. Ramises Villagonzalo miingon nga nasakitan ang pamilyang Oyao sa pagduhig sa pangalan sa ilang pamilya sa maong kaso nga karon gibiay-biayan na sa katilingban.

Giawhag nila ang kapulisan nga tumbukon kun si kinsa sa mga Oyao ang nalambigit sa ilegal nga drugas ug sa nagpatay sa pulis ug dili i-generalize.

Ang pamilyang Oyao miawhag sa National Bureau of Investigation (NBI)-7 ug Philippine Drug Enforcement Agency (PDEA)-7 paghimo og imbestigason mahitungod sa maong kaso.

Gihimakak usab nila nga nakigpinusilay si Joel sa kapulisan gani ila pang gipreserbar ang mga dugo sulod sa lawak sa gitumbok nga suspetsado.

Nagplano usab sila pagduol sa Commission on Human Rights (CHR)-7 alang sa gihulagway nga dili makatarunganon nga pagpatay sa ilang kabanay.

Mibahad sila nga kun kanunayon ang pagduhig sa kinatibuk-ang pamilya sa Oyao sa illegal nga drugas, mopasaka na sila og nagkadaiyang kaso, batok sa kapulisan ug sa uban pa.

Samtang gipahimangnoan ni Chief Supt. Manuel Gaerlan, director sa PRO-7 ang mga sakop nga di mokompiyansa samtang naghimo sa ilang trabaho.

Matud ni Gaerlan nga mas nakabintaha karong panahona ang mga badlongon kay makadala-dala og mga armas kay silang mga polis nga wala nakauniporme ang dili man gayud tugotan gumikan sa gipatuman nga Comelec  gun ban.

“Very strict yung Comelec resolution, dapat naka-uniform, so ‘yun ‘yung mga limitations that we have to abide by, kaya lamang yung mga kriminal di nila sinusunod yung batas, kaming mga alagad ng batas we follow the law, so sometimes it is very difficult,” matud pa ni Gaerlan.

Matud pa niya lisod alang sa usa ka intelligence operative paghimo sa iyang trabaho kun kini mag-uniporme aron lang makadala og armas. (BANAT NEWS)