Papa ug anak dakpan tungod sa drugas

CEBU, Philippines - Duha ka magsuon, usa ka amahan ug ang iyang anak naapil sa mga nadakpan sa kapolisan sa Consolacion atol sa gihimong pagpangronda nila didto sa Sitio Sto. Niño, Barangay Lamac.

Target gyud kapolisan nga dakpon ang magsuon nga sila si Diomedes ug Danilo Pitogo kay dugay na sila nga nakadawat og report nga sila nalambigit sa negosyo sa ilegal nga drugas.

Matud ni Consolacion Police Chief Wilson Abot nga ang duha nalakip sa ilang listahan nga dakponon. Apil usab nga nadakpan mao si Jose Wafer, 58, nga gituohang maoy nag-operate sa usa ka drug den.

Ang anak ni Wafer nga si Junior nadakpan usab samtang gituohang naghingos og shabu uban kanila ni Chealbert Ortega, Arvin Pongasi, Berlindo Arceo ug William Marikit.

Matud ni Sr. Insp. Abot nga ang magsuong Pitogo “priority” gyud nila nga dakponon. Nasakmit sa kapolisan gikan sa mga dinakpan ang 11 gramos nga gituohang shabu nga mokantidad og P136 mil.

Samtang sa lungsod sa Liloan siyam ka tawo ang nadakpan ug nasakmit sa mga polis ang 16 gramos nga shabu gikan sa usa ka drug den sa Barangay Yati kaniadtong Biyernes sa gabii.

Ang mga nadakpan mao sila si Ruben Formentera, 30, Johny Delbo, 23, Jeffrey Dico, 37, Rodrigo Inot, 24, Ronald Arnan, 33, Ramil Brigoli, 47, Elmer Baguio, 34, Camilo Dizo, 39, ug Edgar Baguio, 34.

Sumala pa ni PO2 Erwin Rebada, desk officer sa Liloan Police Station, nga gipahibalo sila nga duna’y nagsuyop og shabu sa maong dapit mao nga ila dayong girespondehan.

Mokantidad og P188 mil nga gituohang shabu ang nasakmit sa kapolisan gikan sa mga dinakpan. (BANAT NEWS)