Init nga panahon mabatyagan na - PAGASA

CEBU, Philippines - Ang Philippine Atmospheric, Geophysical and Astronomical Service Administration (PAGASA) mipahibalo nga epekto sa tail end of the cold front ug hanging Amihan maoy hinungdan sa kalit nga pag usab-usab sa temperatura karon, diin moinit unya mokalit lang usab og uwan.

Sigon ni Engr. Oscar Tabada, director sa PAGASA Visayas ang pag-uwan molungtad hangtud karong adlawa.

Hinoon, sa mga mosunod nga mga adlaw, gikan sa Biyernes hangtud sa Miyerkules sunod semana mohayag na ang kalangitan ug makasinati ang Visayas og init nga panahon.

Gihulagway ni Tabada, ang kainit sa adlaw nga nasinati mas taas itandi sa normal nga temperatura tungod kay misaka kini og kapin sa 1 degree diin epekto kini sa El Niño.

Gipaabot nga mas mosamot ang epekto sa El Niño kun hingpit na nga mawagtang ang hanging amihan.

Ang probinsiya sa Sugbo matud pa ni Tabada makasinati og huwaw sa buwan sa Marso ug Abril, samtang ang Siquijor ug Bohol makasinati og huwaw gikan karong buwana hangtod sa buwan sa Mayo.

Didto sa Mindanao grabe na ang epekto sa El Niño diin ang mga pananom dili na mapuslan ug nangauga usab ang mga umahan.

Gipasabot ni Tabada adunay lain-laing klase sa El Niño ug dili magpareha ang tanan apan ang Mindanao maoy kinagrabehan nga naapektahan. (BANAT NEWS)