Pribadong wharf gusto nga ipagamit

CEBU, Philippines - Mahimong gamiton sa gobiyerno sa Dakbayan sa Lapu-Lapu ang Kasamahan Wharf nga nahimutang sa Purok Gemelina, Brgy. Poblacion atol sa pipila ka buwan nga pag-ayo sa Mandaue-Mactan Bridge.

Si Samuel Mariñas, tag-iya sa wharf  miingon nga dako og matabang ang iyang pasilidad paghatag og kasulbaran sa nagung-ong nga problema sa transportasyon ini og sugdan na ang pag-repair sa MMB.

“Aron paglikay tingali, aron makuha-kuhaan ang trapiko. Nangita sila og lugar nga  alternatibo nga maka-menos sa trapiko. Ma-transport either ang mga tawo o sakyanan. They are looking for barges ug ferry boat nga modunggo,” matud ni Mariñas sa Banat News.

Ang wharf adunay gilapdon nga 1,339 square meters ug kaatbang niini ang Ouano Wharf sa Mandaue City tabok sa Mactan Channel.

Si Mariñas andam nga ipagamit sa siyudad ang maong wharf apan wala pa siyay nadawat nga pormal nga komunikasyon gikan ni Mayor Paz Radaza human kini nisusi sa lugar kauban ang mga opisyal sa Department of Public Works and  Highways lakip na ni Mayor Jonas Cortes sa Dakbayan sa Mandaue.

Plano sa dakbayan nga paninduton ang wharf ug panangtangon kadtong mga makasangad unya sa barges.

Ang Kasamahan Wharf natukod sa tuig 1980 maoy gigamit sa dunggoanan sa mga barges dihang wala ipagamit ang MMB tungod sa pagkaguba niini dihang nabanggaan og barko tungod sa bagyong Ruping.

Apan nakita nga ang dalan padung sa maong wharf libaongon ug kinahanglang ipaayo. Wa pa hinuon masayod si Mariñas kabahin sa posibleng pagpabayad nila sa paggamit sa ilang pasilidad.

Laing wharf sa dakbayan nga nag-atubang sa Mandaue ug siyudad sa Cebu City mao ang Muelle Osmeña nga nahimutang ra usab sa maong barangay nga mao karoy dunggoanan sa mga ferry boats gikan sa Cebu City.  (BANAT NEWS)