Kabataan sa Lapu-Lapu nag ‘flash mob’

CEBU, Philippines - Usa ka “flash mob” o ang kalit nga pagsayaw sa grupo sa mga batan-on ang mipakurat kagahapon sa publiko diha sa City Hall sa Dakbayan sa Lapu-Lapu sa miaging Biyernes sa hapon.

Anaa sa 110 ka mga youth volunteers sa siyudad ang mipakita sa ilahang talento sa pagsayaw, subay sa pagsaulog sa Valentine's Day karong adlawa.

Ang unang eksena, mao ang panaglalis sa duha ka manag-uyab, diin nasayran sa babaye nga adunay karelasyon nga bayot iyang uyab, kinsa mitunga usab sa eksena.

Human sa akting, nanayaw dayon kini kauban ang laing mga youth volunteers nga pulos nagsul-ob og puwa nga mga sinina.

Ang maong kalihukan, gipangulohan ni Nicole Frances Balao, executive assistant sa City Tourism Office.

Mao kini ang ikaduhang higayon nga gipahigayon ang flash mob sa siyudad nga unang gihimo sa miaging tuig.

Ang mga youth volunteers nakasayaw na usab sa sulod sa merkado, sa malls ug sa park ubos sa Marcelo Fernan Bridge.  (BANAT NEWS)