Upat naangol, nasaghiran sa float
CEBU, Philippines - Naangol ang upat ka tawo human nasaghiran sa float sa usa ka remittance center nga gikan niapil og parada ang usa ka motorsiklo sa Sitio Prenza, Barangay Talaga, Lungsod sa Argao pasado alas 5 sa nakalabay sa hapon.
Ang mga biktima giila nga sila si Forfinio Camasura, drayber sa motorsiklo, ug ang tulo ka pasahero nga sila si Gwendolyn Sarno; Maria Daniela Ortega, 12, ug Loreto Coromel, kinsa pulos nadala sa tambalanan.
Samtang ang drayber sa Isuzu Elf nga gihimo’ng float sa parada sa Palawan Pawnshop giila nga si Joel Traya, 40, taga Dakbayan sa Mandaue.
Sumala pa ni Police Officer 3 Bernie Lao, desk officer sa Argao Police Station, nga gikan sa Lungsod sa Dalaguete ang truck kay niapil sa parada sa fiesta.
Paingon na unta nga mouli ang sakyanan nga puno pa sa mga dayan-dayan diha’ng nasaghiran ang motorsiklo nga gisakyan sa mga biktima hinungdan nga kini nangalukot sa karsada.
Gitanggong sa selda sa Argao Police Station ang drayber sa truck samtang nagpaabot sa tagtungod sa mga nangaangol sa ila’ng sunod nga lakang. (BANAT NEWS)
- Latest
