Proyekto gibubo sa Alcoy, Oslob, Sibonga

CEBU, Philippines - Gihangop sa mga residente sa Lungsod sa Alcoy ang pagpaayo sa Kapitolyo sa ila’ng water system nga mao’y kuhaan og tubig sa 4,784 ka residente.

Ang kagamhanan sa probinsiya nihatag og P5 milyones nga budget alang sa rehabilitasyon sa water system. Ang mga tayaon na nga tubo ang gipang-ilisan ug giingong 76 porsyento na ang nahuman sa rehabilitasyon.

Sa laing bahin, ang tubod sa Barangay Balayong, Lungsod sa Oslob ang gikatakda usab nga butangan og water pump.

Lakip sa mga barangay nga makapahimulos sa pagbutang unya og water pump mao ang Caceres, Bonbon ug Pongtod.

Ang tulo ka barangay gilangkuban kini sa 200 ka panimalay.

Mokabat sa P500,000 ang igahin nga pundo sa Kapitolyo alang sa proyekto.

Gawas sa water system, bag-o lang usab nga nakompleto ang renovation sa Oslob District Hospital.

Nikabat sa P1 milyon ang gigahin sa probinsiya nga pundo alang sa pagpalapad sa emergency room sa tambalanan.

Gikan sa 19 ka bed capacity, ang emergency room sa tambalanan maka-okupar na kini karon og 28 ka pasyente.

Gawas sa Oslob, ang Lungsod sa Sibonga nakadawat usab kini og P2.5 milyones nga financial assistance gikan sa probinsiya alang sa infrastructure project, medical equipment ug furniture.

Sa mao’ng pundo, P2 milyones ang gigahin alang sa construction sa multi-purpose building ug P500,000 niini ang gigahin alang sa ekipo ug furniture sa birthing facility sa lungsod. (Brenda D. Batuto/GMR)

May warrant sa pagpangawat nasakmitan og shabu

Gidakop sa kapolisan ang usa ka lalaki sa kaso sa ilegal nga drugas ug pagpangawat kagahapon sa buntag sa San Roque, Pusok Dakbayan sa Lapu-Lapu.

Si Edrowin Ornopia, 37, ang gisilbihan sa kapolisan og arrest warrant sa kaso’ng qualified theft sa alas 5:15 sa buntag nga gipangulohan ni Police Senior Inspector Wayne Magbanua, hepe sa Pusok Police Station 5.

Matud ni SPO4 Jose Rouel Nalzaro, chief investigator sa mao’ng police station, nga ang arrest warrant giisyu ni Judge Raphael Yraztorza sa Regional Trial Court Branch 14 sa Dakbayan sa Sugbo niadto’ng Hulyo 29, 2015.

Atol sa pagdakop, nakuhaan sab si Ornopia og 10 ka gagmay’ng putos sa gituohang shabu ug drug paraphernalia.

"Nakakuha sad mi og info daan nga ni-engage siya sa illegal drugs. Pag-serve namo sa warrant, nag-spot check mi adto na namo nakuhaan og shabu," matud ni Nalzaro.

Gibalhug si Ornopia sa Lapu-Lapu City Police Office-holding cell ug mag-atubang og dugang kaso’ng kalapasan sa Comprehensive Dangerous Drugs Act of 2002 gawas sa kaso’ng pagpangawat.  (BANAT NEWS)