Polis gisuwaya’g pusil apan armas nikagar
CEBU, Philippines - Nakalingkawas sa tinong kamatayon ang usa ka polis human swerteng mikagar ang armas sa gituohang tigpahuyot og ilegal nga drugas nga gusto untang molikidar kaniya diha sa Brgy. Esperanza, Lungsod sa Aloguinsan sa nakalabay nga hapon.
Ang suspek giila nga si Jonas Lapingcao, nagpuyo ra usab sa maong dapit ug padayon karong gipangita human daling nakaikyas.
Matud pa ni Police Officer 3 Solomon Cardoza, desk officer sa Aloguinsan Police nga nahinabi sa Banat News usa ka tawag gikan sa usa ka concerned citizen ang ilang nadawat nga nagpahibalo nga bahin sa usa ka armadong lalaki sa maong lugar. Sumala pa ni Cardoza nga mihatag usab og paghulagway ang nanawag sa buhatan sa kapulisan kung unsa ang gisuot sa lalaki diin kini gikatahong nag-estambay sa usa ka payag-payag tapad sa waiting shed sa maong lugar.
Tayming usab nga naghimo og police checkpoint ang mga sakop sa Aloguinsan Police sa Brgy. Rosario dali sila nga miresponde sa dapit.
Sa pag-abot sa kapulisan sa lugar ilang nakita ang gihulagway nga suspek hinungdan nga ilaha usab kini nga giduol.
Si Police Officer 1 Jonathan Monterde ang mipaduol sa suspetsado, apan sa wala pa kini hingpit nga nakaduol kalit lang mibunot og revolver ang suspek dayon pusil sa polis.
Apan wala nakabuto ang armas niini sa makaduha niini nga pagkablit, si Monterde mibawos pagpapusil apan swerte nakasutoy og dagan ang suspek ug wa maigo.
Atol sa ginukoray gilabay sa suspetsado ang iyang armas og ang usa ka gamay nga kahon nga adunay sud nga upat ka gagmay nga pakete sa gituohang shabu ug tin foil. Narekober usab sa mga polis ang usa ka 38 revolver nga duna’y tulo ka mga bala. (BANAT NEWS)
- Latest
