P1M shabu nasakmit sa San Fernando
CEBU, Philippines - Human sa ilang naangkon nga kritisismo human sa pagpangronda sa National Bureau of Investigation niadtong nakalabay nga bulan ang San Fernando Police ang nakabawi human gironda ang Brgy. Bugho ug nakasakmit sila og gibanabanang kapin P1 milyon nga shabu.
Nasikop sa pagronda si Castro Barameda, 35, nga target sa buy-bust operation human kini nibaligya og usa ka paketeng shabu sa asset sa kapulisan.
Gawas kaniya nadakpan usab sila si Dionesio Baroman, 39, Alejandro Umamalin, 31, Joselito Cabasag, 31, Warren Jakosalem, 30, Joey Manano, 33 ug Mario Canoy, 29, nga pulos naabtan sud sa drug den.
Sumala pa ni Chief Inspector Richard Gadingan, hepe sa San Fernando Police nga lima pa lang ka adlaw ang nakalabay sa dihang ilang nadawat ang impormasyon sa ilegal nga kalihokan sa maong dapit nga ila dayong gihimoan og operasyon.
Narekober sa kapulisan gikan ni Barameda ang duha ka .38 revolvers, usa ka .22 revolver, usa ka KG9 sub-machine pistol, tulo ka magazine, klase klaseng mga bala ug usa ka granada.
Si Barameda mihimakak nga iyaha ang mga armas kay prendado ra kini sa iya, apan miangkon siyang namaligya og shabu gumikan sa kalisod.
Sumala pang Gadingan, dihang nag-imbentaryo pa sila sa ebidensya diha sa lugar adunay mipasalba og armas nga gituohang kauban sa mga dinakpan. Si Manano, 33, vendor ug ubang kaubang nadakpan miingon igo lang sila natulog sa ilang balay sa dihang gisulod kini sa mga polis ug gimandoan nga pahapaon sa salog. (BANAT NEWS)
- Latest
