Binay streamer sa IEC ipaimbestigar

CEBU, Philippines - Ipaimbestigar ni acting Mayor Edgardo Labella ang mga streamers nga gipamutang sa viaduct ug utlanan sa Dakbayan sa Sugbo ug Talisay sa South Road Properties (SRP) atol sa katapusang misa sa International Eucharistic Congress (IEC).

Ang streamer adunay suwat nga "Welcome to Binay Country" nga nikatap sa social media ug nakadawat og negatibo nga mga comments sa mga netizens.

Matud ni Labella nga niadto’ng Domingo sa buntag nakadawat sila og report kalabot sa streamer apan dali siya nimando sa Prevention, Restoration, Order, Beautification, Enhancement (PROBE) Team sa pagpatangtang niini.

Gihangyo usab ni Labella si Konsehal Dave Tumulak sa pag-aksyon niini pinaagi sa closed circuit television (CCTV) aron masuta kung kinsa ang nagbutang.

“Kung ato na kauban, well, wala’y pili,” matud ni Labella.

Tug-an ni Labella nga kung masuta nga kaalyado o kaatbang sa politika ang nagpabutang niini ila kini patubagon kalapasan sa lagda sa balaud.

Gihulagway ni Labella nga wala mahaum sa kalihukan ang pagbutang sa streamer hinungdan nga iya kini gipatangtang.

Si Tumulak sa iya’ng bahin nagkanayon nga wala’y naka-montar nga CCTV sa dapit apan ila kini pangitaan og paagi aron masusi.

Sila si Labella ug Tumulak sakop sa Team Rama nga gipangulohan ni Mayor Michael Rama kinsa mao’y regional coordinator sa United Nationalist Alliance (UNA) nga gipangulohan ni Bise Presidente Jejomar “Jojo” Binay.  (BANAT NEWS)