Nalatayan sa bus patay, bus miikyas

CEBU, Philippines - Maayong pagkapisat sa ulo sa usa ka 48-anyos nga lalaking natagak gikan sa traysikol ug naligsan og bus diha sa Barangay Sabang, Sibonga sa nakalabay nga gabii.

Ang biktima giila nga si Joy Paulino Divinagracia, taga Candaguit sa maong lungsod. Matud pa ni Police Officer 1 Mercy Sedillo sa Sibonga Police nga nahinabi sa Banat News nga paingon sa dakbayan sa Carcar ang biktima sakay og traysikol nga gimaneho sa usa ka Ike Duhilag. Apan pag-abot sa maong dapit nakaligis og ligid sa multicab nga gihimong “early warning device” sa multicab nga nadaot diha sa unahan ug gimaneho sa usa ka Ruben  Sayud, 50, taga Boljoon.

Ang biktima nga naglingkod sa luyo sa drayber nawad-an og balanse ug nalabay gikan sa traysikol ug natunong usab nga maoy pag-agi sa gikasugat nilang bus nga paingon sa Santander ug didto napasok ang biktima sa ilawom ug nalatayan niini. Apan human sa hitabo wala mohunong ang bus nga daw sa wala ra’y nahitabo. Matud pa sa kapolisan, adunay mga estambay sa lugar nga wala usab nakakuha sa body number sa bus apan nasayod na ang kapolisan kun unsa nga bus company ang nakaligis base sa maong impormasyon.

Ang kapolisan padayon karon nga mihimo og dugang nga imbestigasyon sa hitabo aron mahibaw-an kung kinsa ang drayber sa maong bus. (BANAT NEWS)