Pusher sa Yati nasikop

CEBU, Philippines - Nadakpan na gyud ang dugay na nga gipanid-an sa kapolisan nga gikatahapang pusher og shabu sa Purok Mangga, Yati, Lungsod sa Liloan ug nasakmit ang upat ka pakete’ng shabu ug mga kahimanan sa paggamit niini.

Si Police Officer 3 Jayson Gayo sa Liloan Police Station niingon nga ang buy-bust operation nga gipangulohan sa ila’ng hepe nga si Senior Inspector Ramil Morpos ang natigayon alas 6 pasado sa niagi’ng gabii.

Giila ni Gayo ang suspek nga ila’ng nadakpan nga si Roel Gutobat Villaruel, 34-anyos, minyo ug wala’y trabaho nga nagpuyo sa mao’ng dapit.

Matud ni Gayo nga ang ila’ng poseur buyer nga ila’ng kaubang polis mao’y nagpalit og shabu sa kantidad nga P200.

Dugang ni Gayo nga diha’ng gitunol sa suspek ang usa ka pakete’ng shabu, dali kini’ng gidakop ug sa pagrekisa mao’y ila’ng nakuha ang dugang pa’ng tulo ka pakete ug mga drug paraphernalia.

Ang suspek nagtingkagol na sa Liloan Police Station ug gikatakda’ng pasakaan og kaso. (BANAT NEWS)