Papal Legate nibisita sa Talisay

CEBU, Philippines - Malinawon ug yano lang ang pagbisita ni Papal Legate Charles Maung Cardinal Bo sa simbahan sa Don Bosco sa Lawaan 3, Dakbayan sa Talisay kagahapon sa buntag.

Naabot si Cardinal Bo alas 9:30 sa buntag ug wala maglangay nihimo dayon sa Santos nga Misa nga gitambungan sa iya’ng mga kaubang Salesians.

Sa iya’ng wali, nipadayag si Cardinal Bo og kalipay nga siya nahimo’ng Salesians sama sa uban niya’ng kaubanan nga nitambong sa Santos nga Misa kagahapon sa buntag.

Gihinumdum ni Cardinal Bo nga diha’ng 7-anyos pa siya, namatay ang iya’ng amahan ug siya gidala sa ila’ng kura paruko sa Salesians ug didto siya gihimo’ng Salesians brother, nahimo’ng pari, bishop ug nahimu na gyud nga Cardinal.

Asoy niya nga ang determinasyon ni Don Bosco aron pagkab-ot sa iya’ng pangandoy mao’y iya’ng gitanum sa pagpakabuhi ug pagserbisyo sa katawhan.

Gibutyag ni Cardinal Bo nga ang tawo nagkinahanglan og determinasyon aron sa pagkab-ot sa pangandoy.

Gani iya’ng gihangad si Don Bosco tungod sa iya’ng determinasyon sa pagserbisyo sa Ginoo ug ingon man sa isig ka tawo.

Siya nagkanayon nga ang kalipay sa usa ka tawo nagsugod sa personal nga pakighimamat sa Labaw nga Makagagahum.

Gawas sa mga Salesians nga nanambong, niabot sa 1,500 ka tawo ang nitambong sa Santos nga Misa.

Asoy ni Supt. Germano Mallari, hepe sa kapolisan sa dakbayan, nagkanayon nga malinawon ang kalihukan.

Sa hinapos nga pulong ni Cardinal Bo siya nibuhi og pinulungang Cebuano agi’g pagpasalamat niya sa mainitong pagdawat sa mga Pinoy kaniya.

"Daku nako’ng kalipay nga naabot dinhi sa Sugbo. Daghang salamat gihangop ninyo ako," dugang ni Cardinal Bo.

Human sa Misa, si Bo ang nakigdungan og pangaon sa iya’ng mga kaubang Salesians ug dayon biyahe balik sa Siyudad sa Sugbo. (BANAT NEWS)