14 ka tawo sikop sa drugas
CEBU, Philippines - Katorse ka mga tawo ang nadakpan sa managlahing operasyon batok sa ilegal nga drugas sa Criminal Investigation and Detection Group-7 ug mga kapolisan sa Dakbayan sa Naga ug Dakbayan sa Talisay. Ang CIDG-7 pinangulohan ni Superintendent Fermin Armendares III mironda sa Purok Kamagong, Poblacion sa Dakbayan sa Lapu-Lapu ug nasikop sila si Ronald Rota ug Joevic Bayon sa buy-bust operation.
Ang duha ka mga suspetsado ang unang nakasibat sa pagpangronda sa CIB sa maong lugar pipila na ka adlaw ang nakalabay. Sa pagkasikop sa duha nakuha kanila ang P118 mil nga kantidad sa shabu.
Lakip sa mga nasikop mao sila si Macario Japitan, Rey Bacus, Louide Alverio, ug Jomar Montano. Adunay drug den nga gihimo sa dapit nga ginama lang sa light materials. Sa operasyon nga gilusad ni Supt. Jovito Canlapan, hepe sa kapulisan sa Dakbayan sa Naga diha sa Brgy. Langtad nadakpan sa buy-bust operation si Generoso Paunil.
Nasikop usab ang laing pito ka tawo nga nanuyop og shabu sa panimay niini ug sila giila nga sila si Mark Lester Pardillo,; Rey Selin; Antonio Alemento; Richard Geraldez, 29; Brolio Palarion, 39; Elmer Reponte, 33, ug usa ka menor de edad. Nakuha sa operasyon ang 18 ka sachet nga wala nay sulod ug drug paraphernalia.
Samtang sa Sitio Rattan, Brgy. Tanke, Dakbayan sa Talisay nadakpan sa grupo nila ni Supt. Germano Mallari si Mison Moyco, 20, ug nakuhaan siya og usa ka medium pack nga shabu ug laing 13 ka gagmay nga pakete niini nga gibanabanang mokantidad og kapin P50mil. (BANAT NEWS)
- Latest
