Tinun-an sa UP, CTU bansayon sa Korea
CEBU, Philippines - Bansayon sa traditional Korean Arts and Crafts sa Songgok University ang mga tinun-an sa University of the Philippines (UP) ug Cebu Technological University (CTU).
Niadto’ng Lunes sila si Gobernador Hilario Davide III ug Songgok University vice president Wang Eun Sook nipirma og memorandum of understanding sa pag-establisar sa training program ubos sa partnership sa South Korea.
Ang pagbansay-bansay sugdan karong Mayo hangtud Hunyo 2016.
Human sa bansay-bansay, 15 ka tinun-an ang pilion alang sa laing unom ka buwan nga training sa Songgok University sa Gangwon-do, South Korea.
Tumong sa pagbansay sa mga tinun-an aron sila mahimong eksperto ug makamugna og kaugalingong produkto ug makapaambit usab sila sa uban pa’ng mga Pilipino.
Si Dr. Choi Hoon Young, presidente sa Korea Philippines Educational and Cultural Exchange Corporation (KOPEC), nipasabot nga ila’ng target ang public ug state universities hinungdan nga gipili nila ang UP ug CTU isip recipient sa programa.
Subay niini, si Wang nipasalig nga ang Songgok University ang moabaga sa tanang gastohan lakip na sa accommodation ug ticket sa eroplano sa mga estudyante. (BANAT NEWS)
- Latest
