Gwen nalamba sa banyo

CEBU, Philippines - Dili mahuman ni Kongresista Gwendolyn Garcia ang nahabiling tulo ka adlaw sa sesyon sa Kongreso tungod sa iya’ng pagkapiang.

Si Garcia niatubang sa media kagahapon human nakompleto na ang surgery nga gihimo human sa pagkaangol sa iyang paa sa iyang pagkalamba sa banyo dihang nagdali siya sa pag-ilis aron molarga paingon sa Sugbo.

Ang insidente nahitabo niadtong Huwebes sa buntag sa condominium nga iyang giabangan sa Manila.

Ang wala’ng bahin sa lawas ang nadakdak hinungdan nga ang walang ball joint sa bukog sa iyang bat-ang ang nabuak.

Gawas niini nabun-og usab ang walang bahin sa iyang nawong kilid sa iyang mata apan hapit na kini maayo.

Nagdumili si Garcia nga dalhon sa tambalanan sa iyang katabang ug staff ug iyang gipili nga magpahatud sa airport aron makaabot sa iyang alas 11:00 sa buntag nga flight paingon sa Sugbo aron dili mahasol ang iyang mga anak sa pag-adto sa Manila. 

Ang nabuak nga bahin sa bukog mao ra ang giilisan pag-abot niya Chong Hua Hospital sa Sugbo.

Nagduha-duha pa unta si Garcia ug anak nga si Paolo sa himuong surgery apan ang iyang iyaan nga tayming nga naabot sa Sugbo nga usa ka anesthesiologist sa Amerika nga si Dr. Veneranda Cagande ang nakatambag nga ipahigayon ang surgery.

Sabado sa alas 7:00 sa buntag napaubos si Garcia sa hip bone surgery. Gipaubos na karon sa rehabilitation si Garcia aron mabalik sa normal ang panglihok ug matag adlaw adunay therapist nga mobisita niya sa iyang balay.

Matud ni Garcia nga ang iyang therapist nagkanayon nga duha ka buwan maulian na siya.

Si Garcia nipasabot nga sa wala pa siya ma-operahe, wala dayon niya ipasaba ang nahitabo tungod kay dili siya gustong mabalaka ang iyang mga ginikanan.

Nahibawo ang iyang mga ginikanan sa nahitabo niadto lang Domingo sa regular nilang paniudto sa pamilya sa panimalay niini diin wala siya katambong. 

Si Dr. Cagande ug anak sa kongresista nga si Paolo mao na ang nisulti sa nahitabo ngadto sa magtiayong Garcia. (BANAT NEWS)