Cardinal Tagle: Ayaw panghatag og iglalabay

CEBU, Philippines - Giawhag ni Luis Antonio Cardinal Tagle ang katawhan nga kung manghatag og donasyon sa mga tawo nga biktima sa kalamidad seguruhon nga dili na iglalabay.

Kini atol sa iyang pagpaambit may kalabutan sa "The Eucharist and the Dialogue with Cultures" sa ikalima’ng adlaw sa 51st International Eucharistic Congress sa IEC Pavilion.

Matud ni Tagle nga ang simbahan nanginahanglan og cultural intelligence diin dili ra kutob sa physical nga aspeto ang paghatag ug pagpakigsandurot kung dili lakip usab ang paghuna-huna ug paglihok-lihok.

Sumala pa ni Tagle nga ang kultura karon nagkaanam na og kadaghan diin ang mas nisikat karon ang gitawag og digital culture nga gitamdan sa kabatan-onan.

Si Cardinal Tagle nipadayag nga niining panahon karon subo kaayong pamalandungon nga daghan kaayo karon sa katawhan ang magpalit og sobra sa ilang panginahanglanon nga malabay na lang hinuon tungod kay maabtan sa pagkadaut.

Hinungdan nga awhag ni Tagle sa katawhan nga kung mahimo seguruhon nga huptan gyud ang mga gasa ug grasya ug dili kini usikan pinaagi sa paglabay tungod kay mahimo kining mapahimuslan sa uban ilabi na sa mas nanginahanglan.

Matud ni Tagle nga adunay pamilya nga wala’y gikaon ug may pagkaon usab apan wala’y pamilya.

Gipahimug-atan ni Tagle ang pagdungan og kaon sa usa ka pamilya makamugna og mga pagtulun-an sama sa pagsalig, pagpakabana ug pagpanghatag.  (BANAT NEWS)