Mandani Bay gibantayan gihapon

CEBU, Philippines - Bisan kun wala nahinayon ang kalihukan sa 5,000 kapin ka delegadong batan-on sa 51st International Eucharistic Congress (IEC) Youth Day sa Mandani Bay sa reclamation area sa Dakbayan sa Mandaue, sa gihapon ang 150 ka sakop sa Traffic Enforcement Agency of Mandaue (TEAM) ang nagpabilin nga gidestino sa kadalanan.

Si Glenn Antigua, operation chief sa TEAM, nipahibawo nga wala na hinuon nila ipatuman ang pagsirado sa mga dalan nga naglakip sa A. Soriano Avenue ug C.D. Seno.

Gitataw ni Antigua nga ang gidaghanon sa ilang traffic enforcers nagpabilin sa ilang destino sa kadalanan sa pagseguro sa kahapsay sa mangagi nga mga sakyanan nga mopaingon sa mga venue sa kalihukan sa IEC.

Dugang ni Antigua nga ilang gikanselar ang mga day-off sa mga traffic enforcers tungod sa mga kalihukan sa IEC nga ang pipila sa mga venue niini anaa usab sa Dakbayan sa Mandaue.

Gitataw ni Antigua nga andam usab sila nga mopadala og mga tawo sa Dakbayan sa Lapu-Lapu kun gikinahanglan sanglit ang vigil ug ang pagparada sa 5,000 kapin ka batan-ong delegado sa mao’ng dakbayan na man lang gipahigayon.

Naglakip sa kalihukan nga gihimo nga gitambungan sa mga parokyano mao ang Parish Encounters sa upat ka simbahan sa San Roque Parish sa Subangdaku, National Shrine of Saint Joseph sa Centro, Gethsemane Parish sa Casuntingan ug Holy Family Parish sa Maguikay.  (BANAT NEWS)