Latin Mass gihalad sa Asilo

CEBU, Philippines - Gipahigayon sa Asilo de La Milagrosa Chapel ang kinaraan nga pamaagi nga Misa gamit ang pinulungang Latin niadto’ng Martes sa hapon.

Ang Tradintine usa ka “extra-ordinary” mass nga gigamit sa Romano Katolika niadto’ng tuig 1570s hangtud 1960s

Niadtong tuig 1962, si Pope Pios V atol sa Vatican II Council, iya kini giusab ug gitugutan ang mga Simbahan Katoliko nga mogamit sa kaugalingong lingguwahi aron makasabot ang manimbahay.

Sa naandan karong panahona diin ang pari pirme mag-atubang sa mga tawo ug tugutan na sa pagbasa ang laing tawo nga buot mobasa sa Bibliya apan niadtong panahon pa nga gigamit ang Tradintine, ang pari mag-atubang sa altar ug siya mismo ang magbasa sa Bibliya.

Sa wali ni kanhi Hongkong Archbishop Joseph Zen Zekiun nga mao’y naghalad sa misa, naglingkod siya uban ang mga sakristan sa altar ug iya’ng gipaambit sa mga manimbahay nga bisan pa man og aduna’y daku’ng kausaban sa pagpahigayon sa misa, ang importante nga anaa ang presensiya sa bino ug pan nga simbolo sa lawas ug dugo ni Hesus.

Atol sa pagpangalawat, adunay puti nga hapin ang gigunitan sa mga sakristan ug gibutang dapit sa dughan sa mangalawat ug sa ubos ra modawat sa pan.

Sagad sa nanambong sa Misa mao ang pipila ka delegado sa International Eucharistic Congress (IEC), mga batan-on ug mga seminarista.

Si Livory Baguio, usa ka batan-on gikan sa Dakbayan sa Lapu-Lapu, nipadayag nga malipayon ug bulahan ang iya’ng pamati sa pagsinati sa una’ng higayon sa Latin nga Misa bisan pa man dili siya kasabot apan ma-feel niya ang pagka-balaan niini.

Adunay pipila ka simbahan sa Pilipinas ang magpahigayon og Traditional Latin Mass.

Ang Chapel of Relic sa Mount Tabor sa San Jose, Talamban, Dakbayan sa Sugbo ang magpahigayon matag Domingo sa buntag og Traditional Latin Rite Mass. (BANAT NEWS)