Kanta sa 51st IEC, 30 minutos rang gihimo

CEBU, Philippines – Milanat lang og 30 minutos ang seminaristang kompositor sa opisyal nga himno sa 51st  International Eucharistic Congress nga gititulohan og “Christ in Us, Our Hope of Glory.”

Sumala pa sa 34- anyos nga seminaristang Jay-arr Librando, lumad nga taga Lapu-Lapu City ang Espiritu Santo maoy nitabang kaniya sa paghimo niini.

“It was not just me who made the song, it was really the work of the Holy Spirit. In that particular time, it was smooth. Wa ko naghinuktok and inigbasa nako sa readings, ang words murag mosiga and then akong kopyahon. Gihunghungan ko sa espiritu santo unsa saktong isuwat,”sumala pa niya sa interbyu sa The Freeman, igsuong pamantalaan sa Banat News.

Matud pa niya, nahimo niyang inspirasyon ang pagsuwat sa maong awit human siya nakatambong sa Eucharistic Procession in 2013. “Nikalit ra og gawas ang saktong pulong and right melody for that song,” pasabot pa ni Librando.

Sa maong prosisyon tin-aw kaayong irehistro sa iyang hunahuna ang mga pulong ug unod sa pagbasa. Ug daw tinuyo sa kapalaran, nakakuha usab siya og kopya niini tungod kay siya may usa sa nitrabaho sa litaniya sa Eucharistic Procession.

“I did not even finish the procession. I went home and read through the reading of the different Eucharistic authors, including Pope Francis II,” matud niya.

Ang mga pulong nga iyang nadumdoman naggikan sa  Lukas 24:13-35 sa Bibliya nga kabahin sa basahon “Ang Dalan Padung sa Emmaus,” nga naghisgot kabahin sa pito ka milya nga karsada gikan sa Jerusalem padung sa Emmaus nga gilakwan sa duha ka tawo. Ang duha nagsige og tabi ug wala sila makabantay nga nakigdungan kanila sa paglakaw si Hesus.

Sumala pa ni Librando ang unod sa maong pagbasa makita diha sa unang bahin sa awit nga iyang gi-compose ug ang uban personal niya nga mga pagpamalandong base sa maong basahon.

Niadtong Oktubre 2013, ang IEC Secretariat milusad og Theme Song Composition Contest sa tibuok nasud nga kabahin sa pagpangandam sa 51st  IEC.

Ang Secretariat mikuha sa mga bantogan nga mga Filipino composers sa nasud ilabi na kadtong mga duol sa mga kalihokan sa Simbahan pinaagi sa musika.

Adunay 20 ka entries nga giduso ug ang iyang komposisyon nga “Christ in Us, Our Hope of Glory” maoy napiling mananaog.

Matud pa nga ang maong awit maoy gipili sa mga  piniling board of judges human sa duha ka hugna nga search and elimination sa tibuok nasud. Agi’g pahalipay, gihatagan siya og P60,000 sa kompetisyon.

Ang official version niini  gi-interpret sa mga sikat nga singers nga sila si Julie Anne San Jose ug Jomer Limatog, Jr.

Sumala pa ni Librando, dihang nagtungha pa siya sa elementary, iyang nadiskubrehan nga aduna siyay talento sa musika dihang nagtuon siya pagtukar sa kawayang plawta. Dali usab siyang nakat-on sa pagtukar og ukulele, gitara ug piano.

“I don’t have proper music classes. The talent just came in when I started playing instruments,” dugang pasabot ni Librando.

Nagsugod siya sa pag-compose og kanta sa edad nga 13, kasagaran niini mga relihiyosong awit ug mas nabaid siya sa musika dihang nasud na siya sa seminary niadtong 1998.

Nahimo siyang assistant musical director ni Msgr. Rudy Villanueva (2000-2002) ug maoy nahimong director sa mga mang-aawit sa St. Francis of Assisi School. Niadtong 2008, siya nay nag-direct sa iyang komposisyon nga “Kindred Hearts the Musical.”

Tungod sa naangkong kasinatian, nahimo na siyang regular nga entrante sa Cebu Popular Music Festival isip kompositor ug interpreter sukad niadtong tuig      2002.

Nisuway usab siya pagduso og entries sa “Huniño, Halad Kang Sr. Sto. Nino” songwriting competition, sa Marian Songwriting Festival, ug uban pang songwriting competitions sa Cebu nga diin napilian iyang mga obra o ang uban nakasud sa finalist.

Kun wala siya gibuhat, manudlo siya sa mga kabataan sa ‘Voices of Praise of Carmel Ensemble’ ug uban pang choir sa nagkadaiyang mga eskuylahan sa Cebu City.

Lakip sa mga komposisyon ni Librando mao ang ‘Way Laing Makatagbaw” (Huni sa Paglaum, 1999), ‘Beautiful Mary’ (Marian Songfest, 2000), ‘O Birhen Maria, Among Inahan” (Marian Songfest, 2000), ‘Dearly Beloved Mother’ (Marian Songfest, 2003), ‘Gathering Faithfully, Together with Mary’ (Marian Songfest, 2005), ‘O Maria, Gugma Ko (Marian Songfest, 2006), ‘Dearly Beloved Mother” (Our Lady of Fatima Songwriting Contest, 2006), ‘Maria, Among Inahan’ (Marian Songfest, 2007), ‘Bahalag Yabag’ (Cebu Popular Music Festival, 2007), ‘O Holy Child’ (Hunino, HuniHalad Kang Sr. Sto. Nino, 2007), ‘Glorious Mother, We Thank You’ (Marian Songfest, 2008) ug ‘May Balaod Na’ (Enviropop Songwriting Contest, 2008).

Ikaduha siya sa ilang magsuon ug natawo niadtong Septiyembre 11, 1981. Nakahuman siya sa iyang elementarya sa University of San Carlos – South ug high school sa Blessed John XXIII Seminary.

Niadtong tuig 2002, ni- graduate siya sa San Carlos Seminary College  ug nisud sa Seminario Mayor de San Carlos niadtong 2005. – /EIM) (BANAT NEWS)