Lawak sa resort sa mga langyaw gilungkab

CEBU, Philippines – Dul-an sa P150 mil nga kantidad sa mga butang ang nakawat  gikan sa duha ka managtiayong langyaw samtang nangatulog sulod sa usa ka resort sa Basdiot, Lungsod sa Moalboal.

Base sa inisyal nga imbestigasyon sa kapolisan, gisirad-an ang kuwarto ug nangatulog ang mga biktima nga sila si Anja Scherpinski, 38, usa ka German, ug iya’ng bana nga si Hoijin Lee, 37, usa ka Korean, uban ang ila’ng kapin sa usa ka tuig pa nga anak babaye niadto’ng Enero 23 sa gabii.

Buntag sa sunod adlaw mao’y nipukaw kanila ang silaw sa adlaw sa abli na nga pultahan ug sa pagsusi nahanaw na ang ila’ng iPod nga P42,000, Netbook nga P42,000, cellphone nga P12,600, regular reading eye glasses nga P12,600, ug prescription glasses nga P12,600 nga gibutang sa lamesa sulod sa lawak.

Usa ka cellphone ni Anja ang wala apila og kuha sa kawatan ug mao’y ila’ng gigamit aron sa pag-contact sa cellphone ni Hoijin.

Matud ni PO3 Ramon Chinel sa Moalboal Police Station nga wala’y ilhanan nga gipugos pagsulod ang kwarto sa mga biktima. – /GMR (BANAT NEWS)