Anak sa kapitan sikop sa illegal gambling

CEBU, Philippines – Lakip sa nasikop ang anak sa kapitan sa Barangay Suba, Dakbayan sa Sugbo kauban sa laing upat sa gihimo’ng operasyon sa kapolisan sa San Nicolas Police Station kagahapon sa hapon may labot sa illegal numbers game.

Ang hepe nga si Chief Inspector Chuck Barandog nga nangulo sa operasyon niingon ila kini’ng gihimo subay sa kampanya batok illegal gambling.

Gihulagway ni Barandog ang mga illegal gambling operators sa ila’ng lugar nga mga idlas sanglit magbalhin-balhin man sila og lugar.

Apan kagahapon nakadawat sila og report gikan sa ila’ng asset nga diha sa Magsaysay St. Suba dunay nagpataya og swertres mao’ng bisan nag-ulan ila dayon kini’ng giadto.

Didto naabtan ang mga suspek nga sila si Nickson Sable, 45; Allan Tagsip, 42; Ricky Tagsip, 46; Allan Mesias, 22; ug ang anak sa barangay kapitan sa Suba nga si Jomel Sable.

Gisundan sa kapolisan ang mga dinakpan hangtud naabot sa usa ka balay ug didto naaktuhan nga nag-tally ug dunay ni-remit sa halin sa swertres.

Nakuha sa kapolisan ang mga ebidensiya sama sa mga fax machines, tally sheets, stabs ug kwarta nga moabot sa P3,500.

Gihulagway ni Barandog ang anak sa kapitan nga mao’y coordinator sa swertres.

Susihon sa kapolisan kun kinsa ang tag-iya sa panimalay diin nag-tally ang mga dinakpan ug wala usab nila gisalikway ang posibilidad nga basin adunay financier nga nagpaluyo sa ilegal nga sugal. Samtang si Sable nagdumili una sa pagtubag sa pangutana kun nalambigit ba gyud kini sa ilegal nga sugal. – /GMR) (BANAT NEWS)