Kapitolyo nanghatag og sakyanan
CEBU, Philippines – Laing hugna sa pagpanghatag og mga sakayanan ang gipahigayon sa kagamhanan sa Probinsiya sa Sugbo. Gikan sa tuig 2013 hangtud karon, nikabat sa 194 ka motor vehicles ang nahatag sa probinsiya ngadto sa kalungsuran.
Kagahapon sa buntag ang probinsiya nihatag og 14 ka units nga mini-ambulance diin matag usa niini nagkantidad og P204,500 ug nikabat ngadto sa P2.8 milyones ang kinatibuk-ang kantidad.
Ang bag-ong nahatagan mao ang Poblacion I, Dakbayan sa Carcar; Campo 7, Minglanilla; Tayud, Consolacion; Sumaguan ug Mandilikit sa Argao; Dalingding, Paypay, Tapilon, Talisay, Bagay, Bitoon ug Bateria sa Daanbantayan ug South Poblacion, San Fernando.
Laing duha ka units sa Suzuki multicabs nga nagkantidad matag-usa og P134,000 ang gihatag ngadto sa Barangay Usmad, Argao ug Puertobello, Tudela.
Duha ka units sa Honda CFT 125 nga motorsiklo diin matag usa niini nagkantidad og P67,000 ang gihatag ngadto sa Cambaro, Dakbayan sa Mandaue.
Niadto’ng 2013 ang kagamhanan sa probinsiya nakapangapod-apod og unom ka units nga Nissan ambulance; duha ka units nga mini-ambulance ug 50 ka units nga multicabs.
Sa 2014, nikabat sa 13 ka units sa ambulansiya; 14 ka units nga mini-ambulance ug 12 ka multicabs.
Sa tuig 2015, nikabat sa unom ka ambulansiya; 13 ka mini-ambulance; 47 ka units nga multicab ug siyam ka units nga dump truck. – /GMR) (BANAT NEWS)
- Latest
