Davide andam mohatag og luna alang sa DOJ

CEBU, Philippines – Si Gobernador Hilario Davide, III uyon sa hangyo sa Department of Justice (DOJ) nga hatagan sila og luna sa probinsya aron matukuran og bag-ong Palace of Justice.

Kagahapon sa buntag si Regional State Prosecutor Fernando Gubalane ug Assistant City Prosecutor Liceria Lofranco-Rabillas mibisita sa buhatan sa gobernador.

Si Davide mibutyag nga si Gubalane ug Rabillas nag-follow-up sa hangyo sa DOJ. Si kanhi DOJ secretary ug karon bag-ong gitudlong Supreme Court Associate Justice Alfredo Benjamin Caguioa misuwat kaniya ug mihangyo nga mangayo og luna sa probinsiya nga matukoran og bag-ong DOJ building. Nadawat ni Davide ang maong suwat ni Caguioa ug ang gobernador nag-draft na kini sa iyang suwat nga tubag nga andam siyang mohatag og luna sa DOJ.

Matud ni Davide nga ang 3,000 square meters nga luna nga nahimutang sa Department of Agriculture (DA) maoy gitanyag niya nga idonar.

Giingon nga ang DOJ adunay gigahin nga budget sa maong proyekto ug kun kini madayon anha na mahimutang ang regional state prosecutor’s office, provincial prosecutor’s office, Cebu City prosecutors office, Public Attorney’s Office (PAO) ug uban pa nga buhatan sa DOJ.

Si Davide nagkanayon nga ang karaang building sa Palace of Justice ilang gipangayo sa Kapitolyo isip bugti sa gipangayo nga luna sa DOJ.

Matud ni Davide nga kun ihatag sa DOJ ang maong building ngadto sa probinsiya, ipasusi kini niya kun pwede ba kining ma-retro fit aron himuong mga buhatan sa Kapitolyo.

Ang building sa Kapitolyo naghuot na sa mga buhatan ug nagkinahanglan na kini og extension. – /RUB) (BANAT NEWS)