30 ka balay naugdaw
CEBU, Philippines – Miabot sa 30 ka mga balay ang naugdaw atol sa sunog nga miulbo diha sa Spollarium Street, Duljo Fatima sa Dakbayan sa Sugbo kagahapon sa hapon.
Matud pa ni Senior Fire Officer 1 Edwin Handayan, imbestigador sa Cebu City Bureau of Fire Protection nga nahinabi sa Banat News nga ilang nadawat ang alarma sa sunog alas 5:02 sa hapon.
Sumala pa ni Handayan nga nagsugod ang sunog sa gipuy-an ni Noni Semontesa ug dali nga nikatap sa silingan nga mga balay nga sagad hinimo sa light materials. Naglisod ang kabomberohan sa pagtabang sa maong sunog gumikan kay nagsugod kini sa tunga-tungang bahin sa mga balay sa lugar maong gisumpay-sumpay na lang nila ang fire hoses ug paglabay sa 20 minutos ayha pa nila nakontrolar ang sunog.
Dunay impormasyon nga nadawat ang kabomberohan nga problema sa kuryente ang hinungdan sa sunog apan si Handayan miingon nga ila pa kini nga subayon kay managlahi ang kasayuran nga ilaha usab nga nakuha.
Sa kinatibuk-an mikabat sa P400 mil ang kantidad danyos sa maong sunog nga gisaka hangtod sa ikaduhang alarma. Wala'y natala nga namatay o naangol atol sa hitabo. – /EIM) (BANAT NEWS)
- Latest
