Lola katulo gimilagrohan

CEBU, Philippines – Usa ka 73-anyos nga ginang ang nakasinati sa presensya sa Ginoo, sulod sa tulo ka higayon nga nahitabo sa iyang kinabuhi.

Ang maong ginang mao si Marieta "Marit"  Ebo, taga Sitio Kolo Island, Brgy. Mambaling, ning Dakbayan sa Sugbo nga usa ka retiradong kawani sa gobiyerno.  Si Ebo, graduwado sa pagkamagtutudlo sa usa ka katolikong simbahan.

Sumala pa ni Ebo, una niyang nasinati ang presensya sa Ginoo nahitabo dihang nasakit siya og diabetes ug girekomendar na sa mga doctor nga putlon ang iyang tiil.

Tungod sa kaguol ug kahadlok nga mabalda na siya sa tibuok kinabuhi mas gipahugtan niya ang iyang pagsalig sa Kahitas-an dungan sa pag-ampo nga unta mosalir ang mga tambal nga gireseta kaniya aron di madayon ang pagputol sa iyang tiil, tuod man gidungog ang iyang pangaliya ug wala mahinayon ang operasyon ug naulian siya gikan sa maong sakit.

Ikaduhang milagro nga nasinati ni Ebo sa dihang nadiskobrehan nga aduna siya’y stage 3 breast cancer.

Matud niya nagsige na siya og dugo ug girekomendar sa mga doktor nga operahan apan naguol kini kay wala sila’y kuwarta ibayad, sa makausa pa, nidangop na usab siya sa Ginoo.

Usa ka adlaw sa iyang pagsige og ampo, aduna siya’y nadunggan nga hunghong nga nagtambag kaniyang motumar og herbal medicine. Tuod man, way pagduha-duhang nangonsulta siya kabahin niini ug gisunod niya ang pagtumar niini ug nabantayan na lang niya sud palang sa pipila ka adlaw nihunong ang  pagdugo sa iyang dughan ug hinayhinay nga nahilis ang cyst.

Paglabay sa panahon, subli siyang nakasinati og sakit ug ning tungora giatake siya sa sakit sa kasingkasing ug na-stroke.

Matud pa niya , sulod sa pipila ka adlaw siya nga walay kalibotan kun unsay mga nanghitabo sa iyang palibot apan usa nianang mga adlawa, adunay mihunghong kaniya sa pagbarog ug lakaw sama sa naandan.

Tuod man iya kining gisuwayan ug daw nakamata siya gikan sa taas kaayong pagkatulog ug nakabalik siya sa paglakaw ug hangtud karon nakapadayon siya sa iyang naandang gimbuhaton ilabi na ang pagsimba.

Si Ebo, nipadayag nga kinahanglan lang gyud sa tawo nga dili magmakuli pagdangop ngadto sa Labaw’ng Magbubuhat tungod kay sa iyang kasinatian, nakita niya nga mahigugmaon ug andam kanunay modawat ang Ginoo bisan unsa pa ka makasasala ang usa ka tawo.

Si Ebo, usa sa mga mopaambit sa Parish Encounter sa Archdiocesan Shrine of  San Roque diin adunay mga bisita gikan sa nasud sa Hungary nga delegado usab sa International Eucharistic Congress karong semanaha. – /EIM) (BANAT NEWS)