Kapin P.5M shabu nasakmit

CEBU, Philippines – Kapin sa tunga sa milyon nga shabu ang nasakmit sa kapolisan human sa buy-bust operation pasado alas-3 kagahapon sa hapon sa Bacayan, Dakbayan sa Sugbo.

Gidakop sa mga sakop sa Regional Anti-Illegal Drugs Special Operations Task Group 7 sila si Wen Jen “Injong “ Yco Bontuyan ug si Raul Gabud Entice sa buy-bust operation dihang napalitan sila og shabu sa mga polis.

Ang mga suspek napalitan sa mga polis gamit ang P500 nga buy-bust money, ug human natunol ang drugas dali silang gidakop.

Nakuhaan ang mga suspek og usa ka dako pa nga putos, upat ka medium packs, upat ka gamay nga putos lakip na sa subject sa buy-bust.

Ang mga nasakmit nga shabu mokabat og 50 gramos nga mobalor og P590,000 base sa presyo sa Dangerous Drugs Board.

Samtang walo ka mga tawo ang nadakpan sa buwag nga operasyon sa kapolisan sa Dakbayan sa Mandaue, Dakbayan sa Danao ug Lungsod sa Liloan batok sa ilegal nga drugas.

Gironda sa grupo ni Senior Inspector Jimmy Portes, hepe sa Presinto 1 sa Mandaue City Police Office (MCPO) ang balay ni Maricel Flores, 23, diha sa Sitio Ihawan, Brgy. Mantuyong sa maong dakbayan hinungdan sa pagkasikop niini.

Giapil usab og dakop sila si Ranil Arnejo, 23, ug duha ka mga lalaking pulos minor de edad nga nagpuyo sa maong dapit nga gikatahong naaktohang nanuyop sud sa balay ni Flores.

Ang operasyon gihimo pinasikad sa Search Warrant nga giluwatan ni Judge Teresita Abarquez Galanida sa Branch 56 sa Regional Trial Court (RTC) 7 nga nagbase sa maong dakbayan.

Nasakmit gikan sa maong mga dinakpan ang tagsa ka gagmay nga paketeng shabu ug mga drug  paraphernalia.

Samtang sa Sitio Lower Looc, Brgy. Calero sa Lungsod sa Liloan, nadakpan sa buy-bust operation  ang gikatahapang pusher nga si Jayson  Maquilan, 37.

Si Senior Inspector Ramil Morpos nga maoy hepe sa Liloan Police Station maoy nangulo sa buy- bust operation ug napalitan og shabu nga kantidad P500 ang suspek. Dugang usa ka medium size nga paketeng shabu ug usa ka dakong pakete ang ilang nasakmit   nga mokabat sa kantidad nga P47,200 uban sa drug paraphernalia.

Laing nadakpan ang upat ka tawo sa Brgy. Poblacion, Dakbayan sa Danao nga naaktohang nanuyop sud sa usa ka payag. Ang grupo ni Police Officer 3 Fiel Restauro, mitubag og alarma bahin sa mga naghantak apan nanagan ang mga sugarol.

Sa tanto nilang pagpangita, naagian nila ang payag diin nanuyop ang uban hinungdan nga ilang gisikop. – Dechie S. Ordiz, Benedicto College Masscom/EIM) (BANAT NEWS)