IEC Pavilion di wi-fi zone

CEBU, Philippines – Gibutyag ni Msgr. Joseph Tan, tigpamaba sa Archdiocese of Cebu dili wi-fi zone ang tibuok  Pavilion, ang venue kun diin ipahigayon ang sagad sa mga kalihukan sa 51st International Eucharistic Congress nga nahimutang sa Pope John Paul II Avenue, sa dakbayan sa Sugbo.

Matud ni Msgr. Tan, wala nila gihimo nga wi-fi ready ang lugar aron usab maka-focus ang mga delegado sa mga kalihukan sa maong international event.

Ang media center lang sa maong venue ang hatagan nila og access sa wi-fi nga giandam sa usa ka telecommunication company alang sa simpleng downloading ug uploading sa buot mogamit og internet.

Nasayran nga dunay 20 ka computer units nga giandam ug kun kuwangon kini dungagan kini  sa simbahan sanglit duna may laing 20 ka units sila nga nahuwaman.

Sa uwahing inspeksiyon nga gihimo nila ni Msgr. Tan, anaa na sa 98 porsyento nga andam ang venue ug pagpanglimpyo na lang ug pag-andam sa media center ang kuwang.

Giawhag usab niya ang publiko sa pag-ampo aron magmalampuson ang maong aktibidad tungod kay aduna nay mga volunteers nga gipangkapoy tungod sa kadaghan sa gimbuhaton. – /EIM) (BANAT NEWS)