Gikan nangahoy naigo sa saag nga bala

CEBU, Philippines - Grabeng naangol ang usa ka babaye nga naigo sa saag nga bala nga nahitabo sa bukirang bahin sa Cansagiring, Barangay Baring, Lungsod sa Carmen alas 4 pasado sa hapon niadtong Miyerkules.

Si Senior Police Officer 3 Simplicio Gibo sa Carmen Police Station niila sa biktima nga si Jona Emperado Bongo, 30-anyos, nagpuyo sa maong dapit.

Matud ni Gibo nga gikan pa ang biktima nga nangahoy.

Dihang nahidangat na sa ilang panimalay, maoy iyang gihimo ang pagtapok niini sa tugkaran sa ilang panimalay.

Samtang nagpadayon kini sa iyang gibuhat, maoy nabati ang lanog nga buto sa armas.

Paglabay sa pipila ka gutlo maoy namatngonan sa biktima ang pagpamanhud sa iyang walang bitiis ug sa pagsusi nasuta nga nagkadugo na ang iyang bitiis nga naigo sa saag nga bala.

Dali nga gidala ang biktima sa Danao Provincial Hospital ug gibalhin sa Vicente Sotto Memorial Medical Center sa Dakbayan sa Sugbo. (BANAT NEWS)