Anak wa hatagi og kwarta, mama gidunggab
CEBU, Philippines - Tungod kay wala siya hatagi og kwarta, gidunggab sa lalaking sabog sa ginadiling drugas ang iyang inahan sa ilang panimaye sa Sitio Hollow Block, Barangay Lagtang, Siyudad sa Talisay niadtong Miyerkules sa gabii.
Ang biktima mao si Susana Paduga, hingkod, samtang ang iyang anak nga suspek mao si Mateo Paduga, 39-anyos.
Si SPO2 Yvonne Ilustrisimo sa Talisay City Police Station nagkanayon nga nangayo og kwarta ang suspek sa iyang inahan apan kini gibalibaran.
Ang anak nanghagis ug nikuha og gunting dayon dunggab sa iyang inahan kinsa nakaangkon og mga samad sa iyang kalawasan.
Matud ni Ilustrisimo nga maayo na lang gani kay dali nga nakatawag og tabang ang biktima sa kapolisan.
Pag-abot sa awtoridad ilang na dis-armahan ang suspek apan sa pagrekisa niini aduna kini .38 revolver ug usa ka bala nga gisuksok sa kilid sa lawas.
Dugang ni Ilustrisimo nga sabog pa sa ginadili’ng drugas ang suspek hinungdan nga nawagtang sa iyang paminsar ug nakaako og dunggab sa iyang inahan.
Gipasaka na nila ang kaso’ng kalapasan sa Comelec gun ban batok sa suspek kagahapong adlawa ug posibleng mosunod ang pagpasaka og kaso sa inahan batok sa iyang anak. (BANAT NEWS)
- Latest
