Siyam ka nanguot sa Sinulog nadakpan

CEBU, Philippines – Siyam ka mga lalaki ug babayeng gituohang sakop sa grupo sa mga mangunguot ang nasikop sa mga sakop sa Theft and Robbery Section (TRS) sa Cebu City Police Office.

Ang mga dinakpan mao sila si Guillermo Ocampo Diaz, Arvin Jan Ballesteros, 22, Renz Boncalan, 26, Cindy Mercado, Carla Santos, 23, May Cruz Vilasco, 25, Adrian Lopez, 34, Cris Fernandez, 33 ug Charizze Adriano, 24

Ang tanan nga mga dinakpan ang nagpuyo sa Taguig, Makati, Bicutan ug duna usa’y taga Pasay.  Apan ang ilang giila nga leader ug recruiter nga si alyas Jorge ang nakasibat atol sa pagsubay sa kapulisan.

Sumala pa ni Sr. Insp. Rolito Supatan, hepe sa Theft and Robbery Section sa Cebu City Police Office, unang nadakpan si Diaz human kini naaktohang nanguot og mahalong selpon diha sa Mango Square sa nakalabay nga gabii.

Ang tag-iya sa selpon nga si Kara Lim, 21, nakabantay ug mikisikisi hinungdan nga nadakpan si Diaz.

Sa gihimong imbestigasyon sa kapulisan ilang nasayran nga duna pa’y mga kauban ang suspetsado nga nagpundo sa usa ka pension house diha sa North Reclamation Area sa Brgy. Carreta.

Sigun pa ni Supatan nga sa pag-abot nila sa gipuy-an sa mga suspetsado usa sa mga kauban ni Diaz ang nakabantay ug midagan sa ilang gipuy-an nga lawak.

Sulod sa gipuy-an sa mga suspetsado nga duha ka mga lawak nakuha sa kapulisan ang nagkadaiyang mga IDs, mga ATM cards ug mga pitaka.

Si Chief Insp. David Señor, hepe sa Police Community Relations (PCR) sa CCPO miingon nga ang maong grupo lagmit didto pa gikan namiktima sa  pista sa “Black Nazarene” sa kaulohan kay duna usa’y mga pitaka ug mga i.d. nga iya sa taga Luzon nga narekober.

Samtang usa sa mga nadakpan nga si May Cruz Velasco nadakpan na usab kaniadto didto sa Taguig sa kaparehas nga kaso.

Kung wala masikop sa kapulisan ang mga suspetsado nagduda ang kapulisan nga hayan mangbiktima pa kini sa mga tawo sa kalihokan sa International Eucharistic Congress ug mopaingon na usab sa Ati-Atihan Festival.

Petsa 14 pa ning buwana nangabot sa dakbayan ang grupo apan nangangkon nga igo lang sila mamista dinhi, apan sa kadugayan niangkon silang panguot gyud ilang trabaho kun asa ang dunay dagkong kapistahan. – /EIM) (BANAT NEWS)