11 nasikop sa shabu

CEBU, Philippines – Napulo ka tawo apil ang usa ka pamilya ang nadakpan sa pagpangronda batok ilegal nga drugas sa mga sakop sa Cebu Provincial Police Office.

Nadakpan sa kapolisan sa Lungsod sa Minglanilla diha sa Sitio Tres de Mayo, Poblacion, Ward 4  sila si Michael Secuya, 23; inahan niining si Jocelyn Secuya, 52; Teresito Bingcolado, 31, bayaw ni Michael ug laing paryente nga si Jaylord Silva, 27.

Si Chief Inspector Franco Oriol, hepe sa kapolisan sa maong lungsod nitug-an sa Banat News nga ang ilang target mao si Michael kinsa napalitan og drugas sa ilang poseur buyer. Matud pa diha atol sa transaksyon ang ubang mga dinakpan.

Nakuha sa mga otoridad ang 20.36 gramos nga gidudahang shabu nga moabot ang kantidad niini sa P240,248. Laing nakuha sa kapulisan mao ang P700 nga kwarta nga halin sa suspetsado ug drug paraphernalia.

"Ang inahan gyud ni Michael maoy nagsugod pagnegosyo ini unya iya dayong gitudloan ang iyang mga anak," nagkanayon si Oriol.

Samtang nasikop usab sa mga sakop sa Provincial Intelligence Branch (PIB) sa Cebu Provincial Police Office ang mag live-in partner  nga sila si Joel Castañares ug Mildred Alcoseba diha sa Sitio Lumboy, Liburon sa Dakbayan sa Carcar.

Sumala pa ni Sr. Supt. Clifford Gairanod, direktor sa CPPO napalitan og P200 nga shabu ang duha hinungdan sa ilang pagkasikop.

Nakuha kanila ang gidudahang shabu nga mitimbang og 55.54 gramos nga duna’y kantidad P655, 372, usa ka .45 caliber pistol nga adunay duha ka mga magazines ug unom ka bala.

Si Mildred Alcoseba mihimakak nga nalambigit kini sa pagpayuhot og shabu, apan sa dihang kini gipakita sa kuha nga video sa asset sa pulis nga nakita kini nga mitunol og shabu wala na kini mitingog sa mga tigbalita.

Sa laing operasyon, mokabat sa P117, 495 nga kantidad nga shabu uban sa mga drugs paraphernalia ug gambling paraphernalia nga suwertres ang nasakmit sa pagpangronda sa kapolisan sa usa ka panimalay sa Dakit, Lungsod sa Sogod ug tulo ka tawo ang nasikop.

Si Police Officer 2 Raymond Bacordo sa Sogod Police Station miila sa mga nadakpan nga mao sila si Dennis Brigole, 39; Ritchie Brigole, 21, Kim Brigole, 19, Victoriano Lepardo Jr., 35; ug  Wilfredo Ruelan, 30.

Ang operasyon gipangulohan sa hepe nga si Senior Inspector Arvi Arbuis  pinasikad sa search warrant nga giluwatan ni Judge Jerry Dicdican sa Branch 25 sa Regional Trial Court (RTC) 7 sa Dakbayan sa Danao. Ang warrant nakapangalan kang Dennis Brigol. – /EIM) (BANAT NEWS)