Mga magtutudlo gipangkasab-an sa mayor?

CEBU, Philippines - Ang city division superintendent sa Department of Education (DepEd) sa dakbayan sa Carcar gidapit sa pagtambong sa sesyon sa Cebu Provincial Board karong Lunes aron maklaro kun tinuod ba ang report nga sila gikasab-an sa mayor.

Gikataho nga ang mga magtutudlo sa publikong tunghaan sa Carcar gipatawag ni Mayor Nicepuro Apura tungod sa pagdawat nila og mga school supply ug school bags nga alang sa mga tinun-an.

Si Board Member Raul Alcoseba nga maoy nang-apud-apod sa mga school supply ug school bags nagkanayon nga nakadawat siya og report nga ang mga magtutudlo gipatawag ni Apura ug gimandoan nga dili  ipadawat ang iyang ipanghatag nga mga school supplies.

Gipasabot ni Alcoseba nga ang maong mga school supplies gikan kini sa MLhuillier Pawnshop ug ang paghatag sa donasyon kabahin kini sa ilang community service.

Matud ni Alcoseba nga ang MLhuillier diha kaniya nakig-coordinate ug nagpatabang nga makapang-apud-apod og mga school supply ngadto sa mga estudyante sa publikong eskwelahan.

Matud usab niya nga dili lang ang dakbayan sa Carcar ang nakadawat og mga school supplies gikan sa MLhuillier kun dili lakip na ang ubang mga tinun-an sa laing eskwelahan sa ubang lugar sa dakbayan sa Sugbo.

Si Alcoseba nagkanayon nga buot lang nila nga masayran gikan kang Cyrus Ellijorde, city division superintendent sa Carcar, kun wala bay bulok politika ang gihimo sa mayor. Sa miaging tuig mikabat og 1,800 ka bag nga gisudlan og school supplies ang naapud-apod sa grupo ni Alcoseba ug sa MLhuillier ngadto sa mga tinun-an sa unom ka tunghaan sa Carcar. (BANAT NEWS)