IEC na sab ang atimanon sa kapolisan

CEBU, Philippines – Human sa Sinulog, laing atubangon sa kapolisan ang umaabot nga 51st International Eucharistic Congress (IEC) nga sugdan karong Enero 24 hangtud 31.

Si Chief Supt. Manuel Gaerlan, direktor sa Police Regional Office-7, niingon nga dunay dyutay nga kausaban sa pagpadagan sa seguridad ang ila’ng himuon sa IEC. Gusto ni Gaerlan nga mas mahugtan pa sa mga polis ang seguridad human may kakuwangan siya nga nakit-an sa Sinulog.

Matud ni Gaerlan nga dili siya gusto nga maglingkod lang sa opisina ang iya’ng mga sakop nga junior officers ug gusto niini nga sila apil nga molibot sa ila’ng mga ginsakupan nga lugar aron personal nga makita ang kahimtang ug mangunay sa pagmando sa ila’ng sakop.

Gitug-an sa heneral nga duna siya’y gipangkasab-an nga mga police officials human wala niya nauyoni ang gihimo nga trabaho atol sa Sinulog nga didto ra sa ila’ng opisina samtang ang ila’ng mga sakop nagbuwad sa init.

Kung asa ipahigayon ang kalihukan, bantayan kini sa kapolisan matud ni Gaerlan.

Kabahin sa hulga sa seguridad, si Gaerlan nipasabot nga andam ang kapolisan sa pagtubag sa bisan unsa nga hulga uban sa tabang sa military ug ubang ahensya. Samtang gihimo na karon sa unom ka presinto sa Mandaue City Police Office (MCPO) ang mga checkpoint sa nagkalainlaing lugar isip kabahin sa pagpangandam sa IEC ug Comelec gun ban. Si Chief Inspector Jimmy Aguisanda, deputy director for operations sa MCPO, niingon nga giabagan sila sa mga barangay tanod gikan sa 27 ka barangay sa dakbayan uban sa mga police interns sa mga unibersidad.

Usa sa kalihukan sa dakbayan mao ang Jericho Walk sa mokabat 5,000 ka batan-on gikan sa Dakbayan sa Lapu-Lapu subay sa Mandaue-Mactan Bridge paingon sa Mandane Bay sa North Reclamation Area. – /GMR) (BANAT NEWS)