Sulogoon sa merkado gipusil samtang nagtagay

CEBU, Philippines – Patay diha-diha ang 21-anyos nga lalaki human gipusil sa ulo samtang nakig-inom sa iya’ng higala sa Riverside, Duljo Fatima, Dakbayan sa Sugbo pasado alas 6 kagahapon sa gabii.

Bisan sa kadaghang mga polis nga gipakatap sa dakbayan atol sa Sinulog apan nakalusot gihapon ang nipusil patay sa biktima nga si Bartolome Milo, wala’y klaro’ng address ug giila nga sugoonon sa Taboan Public Market ug usahay makita usab sa Duljo Fatima. Sumala pa ni Senior Police Officer 3 Filomeno Mendaros, imbestigador sa homicide section sa Cebu City Police Office, nga samtang nakigtagay ang biktima kauban ang iya’ng usa ka higala, kalit lang niabot ang gunman sa likod dayon pusil sa iya’ng bagol-bagol.

Human nahagba sa yuta ang biktima yano ra sab nga nisibat ang kriminal. Ang mga sakop sa Cebu City Emergency Medical Services (CCEMS) nga gipangulohan ni Konsehal Dave Tumulak ang suway pa unta nga nitabang sa biktima apan nakabsan gyud sa kinabuhi.

Si Mendaros niingon nga ila gipangita ang gikainom sa biktima kay posible’ng nakakita kini sa panagway sa gunman.

Ang mga tawo sa lugar niingon nga wala’y kontra ang biktima ug dili usab kini badlongon.

Nagduda si Mendaros nga lagmit nakakita og bikil o nakasala ang biktima sa mao’ng dapit hinungdan nga kini gipatay.

“Kay niingon pa man to’ng iya’ng kauban nga ‘ngano’ng gidaginot pa man tawon ni,” asoy ni Mendaros.

Bugtong pangitaan og salapi sa biktima mao ang pagpa-parking sa mga sakyanan sa mao’ng dapit, sugoon sa merkado ug usahay mamasura.

Sa crime scene narekober sa kapolisan ang duha ka basiyo sa kalibre .45 nga pistola nga gituohang gigamit sa kriminal. – /GMR) (BANAT NEWS)