9 BOPK councilors imbestigahon

CEBU, Philippines - Wa pa gihapon mahuman ang kontrobersiya sa P2.8 bilyones nga Supplemental Budget-1 sa Cebu City Government niadtong 2015 .

Kini human nga ang Office of the Ombudsman for the Visayas deputy Ombudsman Paul Elmer Clemente nakakita og igong basehan aron ipadayon ang imbestigasyon sa kasong kriminal ug administratiba nga gipasaka sa unom ka magbubuhis batok sa siyam ka mga konsehal sa Dakbayan sa Sugbo nga pulos sakop sa Bando Osmeña Pundok Kauswagan (BOPK).

Niadtong Nobiyembre 23,2015 mipagawas og kamandoan si Clemente nga nakakita ang iyang buhatan og basehan aron imbestigahan ang reklamo ug gimandoan ang maong mga gireklamong konsehal pagduso og counter-affidavit uban sa ilang mga ebidensya bahin sa kaso sud sa napulo ka adlaw ini og kahuman nila og dawat sa kamandoan.

Kahinumdoman nga mipasaka og kaso  sila si Rolando Zozobrado, Sofio Miral, ug Bernardo Tamundo batok sa maong mga konsehal kay matud pa nila naapektahan siya sa gibuhat sa  maong mga konsehal sa P2.8 billion SB-1 sa niaging tuig.

Matud pa nila, adunay bahin sa maong budget nga gikinahanglan kaayo aron masulbad ang giatubang mga problema sa katawhan nga kinahanglang aksyonan sa siyudad.

Ang tulo mipasangil sa BOPK councilors nga nakahimo og “malfeasance, dereliction of duty, gross misconduct, grave abuse of authority, violation of oath of office and malversation of public funds. Ang mga gipangreklamong konsehal mao sila si Margarita Osmeña, Sisinio Andales, Alvin Arcilla, Nestor Archival, Roberto Cabarrubias, Alvin Dizon, Eugenio Gabuya Jr., Mary Ann delos Santos ug Nida Cabrera.

Dugang sa misang-at og reklamo mao si Evelyn Montes niadtong Disyembre 2015 diha gihapon sa Ombudsman ug gusto niya nga suspensuhon ang maong mga konsehal samtang giimbestigar ang mga kasong paglapas sa Anti-graft and Corrupt Practices Act, Code of Conduct and Ethical Standards for Public Officials and Employees, ug Local Government Code tungod sa wala nila pagpasar sa SB-1 bisan di makatarunganon ang ilang rason.

Nipasaka usab og kaso nga mandamus batok kanila  si Atty. Jose Daluz III, gusto ni Daluz nga mandoan sa korte ang maong mga konsehal nga papasaron ang SB-1 tungod kay ilang mandato ang pagtuki ug dili lingkuran lang ang supplemental budget. Ang SB-1 gamiton sa pagbayad sa kuwang sa utang sa siyudad sa South Road Properties, P87 milyones alang sa garbage tipping fee, P77 milyones alang sa City Hall employees’ productivity enhancement incentive ug uban pa.

Ang SB-1 adto unta kuhaon gikan sa halin sa SRP lots, apan ang gipangkiha nga konsehal di mosugot kay matud pa nila di mahimong gamiton ang halin sa SRP kay aduna pa kini kaso nga natanggong sa korte.

Ang gipasabot nga kaso mao ang pagkwestyon sa usa ka Romulo Torres ngadto sa korte bahin sa paggamit sa halin sa luna sa SRP. Apan ang korte nibasura na niini kay mahimong gamiton ang halin sa SRP lots.

Si Archival kinsa maoy presiding officer sa konseho mimando ni City Attorney Jerone Castillo nga mohimo og draft nga mohimo og counter-affidavits sa BOPK councilors nga maoy iduso ngadto sa Ombudsman. - /EIM (BANAT NEWS)