Nakapasaylo tungod sa senyor Sto. Niño

CEBU, Philippines - Kung sa uban lisud ang pagpasaylo, apan nahimo kini sa usa ka deboto sa Senyor Sto. Niño bisan ang tawong iyang gipasaylo nakatampo sa pagkaguba sa pagkatawo sa iyang igsuon.

Kini maoy kasinatian nga gipaambit sa usa ka 49-anyos nga ginang nga taga habagatang bahin sa probinsya sa Sugbo nga nihangyong di magpahingalan aron maprotihian ang iyang pamilya.

Ang iyang kasinatian nasentro sa iyang manghod ug sa pamilya niini nga anaa na karon niya papuy-a sa ilang balay.

Pipila ka tuig na ang nakalabay dihang naminyo ang iyang manghod nga lalaki nga usa ka security guard ug nanarbaho dinhi Dakbayan sa Sugbo.

Ang iyang manghod tarong nga pagkatawo ug mapinanggaon nga bana ug ngadto sa duha niya ka mga anak samtang nagpuyo sila dinhi sa siyudad. Sama sa ubang mga magtiayon, kabahin na gyud ang lalis-lalis apil na ang mga pagdudang posibleng adunay lain ang kapikas.

Tungod lagi kay pinangga niya iyang igsuon iya silang gipabalhin sa ilang lungsod sa habagatang bahin sa Sugbo ug didto gipapuyo. Apan matud pa sa ginang, dihay usa ka higayon niadtong 2014 nga nagkabikil ang iyang igsuon ug ang kapikas niini tungod sa nadawat nga impormasyong adunay gikabuangang laing lalaki ang kapikas sa iyang manghod.

Matud pa dihay usa ka recorded message sa cellphone nga nahuptan sa iyang manghod nga diin pwerteng ka “sweet” sa babaye ngadto sa laing lalaki. Nisamot pa gyud kini dihang nahibaw-an sa iyang manghod nga namabdos iyang asawa ug dili iya. Ug gimaldisyon pa sa babaye ang iyang manghod diha sa maong recorded message maong gipalayas.

Ang babaye mibiya apan gibilin ang duha nila ka mga anak.

Apan paglabay sa pipila ka buwan, nahibaw-an nalang niyang nagbalik iyang manghod ug ang asawa niini nga nanganak na sa gimabdos ug gidawat gihapon kini sa iyang manghod bisan di iya.

Ang duha nidesisyon mobuwag  og puyo  ug gidala ang duha ka bata.

Apan niundang sa iyang trabaho iyang manghod ug namaligya na hinuon og drugas.

Bisan gisigehan nila og tambag  wala kini mopatuo hangtud nga nadakpan sa kapolisan ug nabilanggo karon sa Cebu Provincial Detention and Rehabilitation Center sa Brgy. Kalunasan, Cebu City. Ang asawa sa iyang manghod gustong mobiya kauban sa ikatulo niining anak  sa laing lalaki.

Apan tungod sa ilang  paglantaw sa kabalaanon sa pamilya, ilang gisagop ang pamilya sa iyang manghod. Nagpasalamat  siya kay nakasabot ang iyang bana ug iyang mga anak  sa iyang desisyon.

“Nahimo man gani sa Ginoo ang magpasaylo. Nahimo man gani sa akong manghod nga magpasaylo nga siya gyud ang mas nasakitan. Ako pa kaha?,” matud pa sa ginang. Bisan tuod anaa na sa bilanggoan iyang igsuon, apan nalipay kini nga tibuok gihapon ang iyang pamilya nga nagpaabot sa iyang paggawas.  Ang Catholic Bishops Conference of the Philippines subay sa suwat sa Sto. Papa, karong tuiga mao ang "Year of Family, Year of the Eucharist." - /EIM (BANAT NEWS)