Nimao-mao sa pirma ikiha ni Luigi

CEBU, Philippines - Mopasaka og kaso si Kongresista Gabriel Luis "Luigi" Quisumbing batok ni Bryan Paragele kinsa giingong nimao-mao sa iya’ng pirma.

Sa niagi’ng Disyembre, ang kampo ni Quisumbing naalarma human usa ka wala nagpaila ang nibutyag ngadto kaniya nga si Paragele nga taga Purok Tambis, Casuntingan, Dakbayan sa Mandaue ang nigamit og peke nga authorization letter nga gigamit niya sa National Statistics Office.

Ang reklamo una’ng gisang-at ni Quisumbing sa Casuntingan Police Station diin iya’ng giklaro nga wala siya nihatag og authorization letter kang Paragele.

Nasayran sab nga sayop ang pangan nga gigamit ug pulos mga angga lang sa ginikanan ni Quisumbing ang gigamit atol sa pagkuha sa birth certificate sa NSO.

Dugang niini, nangayo si Quisumbing og written explanation sa NSO labot sa sayon nga pagkuha ni Paragele sa personal nga dokumento.

Nangayo sab ang kongresista og video footage sa NSO aron masubay ang insidente.

"The NSO has pledged for full cooperation. They consider this a breach of their own security system and they certainly make sure that they can tighten up their system so that this won't happen again," matud ni Quisumbing.

Wala matino sa grupo ni Quisumbing ang tinuod nga motibo sa pagkuha ni Paragele sa birth certificate niini ug dili sab siya ganahan mohukom nga politika ang motibo.

Isip usa ka opisyal sa gobiyerno, wala mahulga si Quisumbing sa ilegal nga kalihukan ni Paragele apan gikabalak-an niya ang privacy sa mga indibidwal nga gusto itago ang personal nga impormasyon sa publiko. - /GMR (BANAT NEWS)