Wala nagparehistro niapil gihapon sa Fluvial Procession

CEBU, Philippines – Hapsay ug malinawon nga napahigayon ang fluvial procession sa imahen sa Senyor Sto. Niño ug Birhen sa Guadalupe pabalik sa Basilica Minore del Sto.Niño de Cebu sa Dakbayan sa Sugbo gikan sa Dakbayan sa Mandaue.

Kini bisan pa man adunay pipila ka mga gagmay nga mga sakyanan sa dagat nga wala marehistro ang misalmot sa prosisyon nga nakaingon sa pagkalangay sa maong kalihokan.

Gibanabanang lapas 100 ka mga sakyanan sa dagat ang nisalmot nga gisakyan usab sa mga kadagkoan sa simbahan pinangulohan ni Cebu Archbisjop Jose Palma, debotos apil na ang mga nagkadaiyang lokal nga mga opisyales sa gobiyerno.

Diha pa lang sa Pier Uno, aduna nay nagpaabot nga dul-an 50 mil ka mga debotos aron sugaton ang mga imahen ug ihatud pagbalik sa basilica.

Si Cebu Coast Guard Station Commander Agapito Bibat nibutyag nga 101 ka mga sakayan ang opisyal nila nga nalista apan atol na sa pagsugod daghang nisagol nga mga gagmay nga sakayan nga wala magparehistro.

Sila usab maoy gitumbok nga hinungdan sa pagkalangay kadiyot sa galleon sa Pasil area tungod sa kadaghan nga mga nag-atang. Gusto karon ni Bibat nga ilhon kung kinsa ang mga tag-iya sa maong mga motorbanca aron ila kini nga mapatawag. Hinuon bisan pa niini, luwas nga nakadunggo ang tanan diha sa pantalan ug nahuman ang prosisyon balik sa basilica. Si Lt. James Reyes sa Naval Forces Central nipadayag nga walo nila ka sea crafts ug 200 ka mga personel ang nitabang sa seguridad sa fluvial procession.

Human sa fluvial procession gisunod usab gilayon ang misa sa unang bunyag ug kasal diha sa basilica nga gipangulohan ni Fr. Jonas Mejares diin iyang giawhag ang katawhan nga wagtangon ang pagkagarboso ug magpaubos ug sundon ang Balaang Bata nga tinubdan sa kaluoy, katahom ug puangod.

Apan bisan sa mga pagdili sa pagpalupad og pabuto ug balloons aduna gihapoy mga nihimo niini sa habig sa Dakbayan sa Lapu-Lapu ug Mandaue agi og pagsaludo sa Balaang Bata sa paglabay niini sa ilang tungod bisan adto sila sa layo.

Sa ibabaw nga bahin sa Mandaue-Mactan Bridge naglumbay nga mga deboto, nakadugang usab sa kamabulokon sa kalihokan ang mga buwak nga gibubo sa naglupadlupad sa kahanginan nga abyon ug ang pagpatingog sa mga nagangkoraheng mga barko sa ilang siren. Aduna say mga deboto nga plano untang mosakay sa mga barko apan tungod kay dugay silang gipasud sa gwardiya sa Ouano Wharf wala sila makakuyog ug nakontento na lang sa pagsaksi gikan sa pantalan. – Sheriza Mae Uy, ug Romeo Limpangog/EIM) (BANAT NEWS)