Devotee City 2016 giablihan na

CEBU, Philippines – Minus pa ang nangabot ug nagparehistro nga mga deboto atol sa pagbukas sa Devotee City 2016 kagahapon nga gitambungan ni acting Mayor Edgardo Labella ug ubang opisyal.

Apan gilauman nga may daghan pa nga deboto nga mangabot gikan sa lagyo’ng dapit karong adlawa.

Matud sa chairman sa Devotee City Konsehal Roberto “Bob” Cabarubias, nga mas daghan ang bata ang niuban karong tuiga. Duda niya nga kini tungod sa mga kalingawan nga alang sa mga bata nga tagsa ra makakita sa ila’ng lugar.

Sama sa mga nilabay nga Sinulog minus ang una’ng adlaw sa pagbukas sa Devotee City apan pag-abot sa hapon adunay unom ka buses ang nangabot gikan sa habagatan ug amihanang bahin sa Probinsya sa Sugbo.

Karong adlawa usab gilauman nga mangabot ang mga deboto gikan sa gawas sa Sugbo.

Samtang may nahinumduman si Cabarubias nga usa ka tiguwang nga taga Mindanao nga nisaad kaniya nga samtang buhi pa moanhi gyud siya sa Sugbo aron pagtambong sa kapistahan sa Balaang Bata.

Duha na ka tuig ang nilabay wala na kini niya nakit-i ug nahinumduman ni Cabarubias sa sulti sa tiguwang nga kun dili na siya makabalik pasabot nga patay na.

May buntis usab nga lima na ka tuig ang nilabay nga nagbati sulod sa Devotee City ug karon pagbalik nila gikan sa Mindanao, iya’ng nasuta nga nanganak na kini ug gipangalanan sa inahan nga “Niña” ang bata’ng babaye.

Adunay kompleto nga pasilidad ang Devotee City sama sa lutuanan, pansayan ug uban pa. (Sheriza Mae R. Uy/GMR)(BANAT NEWS)