Full alert sa sugbo

CEBU, Philippines – Gibutang karon sa full alert status   ang tibuok pwersa sa kapulisan lukop nasud sugod niadtong petsa 14 human sa pagpamomba nga nahitabo sa Jakarta, Indonesia.

Kini ang gitug-an ni Sr. Supt. Rey Lyndon Lawas, regional director for operations sa Police Regional Office-7.

Si Lawas miingon nga kini gituyo aron magamit ang tanang sakop sa kapulisan aron mas mapalig-on pa ang seguridad sa palibot.

Matud pa ni Lawas nga dinhi sa Sugbo, daan nang alerto ang kapolisan tungod sa mga dagkong umaabot nga kalihokan sama sa Sinulog ug ang 51st International Eucharistic Congress.

Sumala pa ni Lawas nga bisan og nakahan-ay na ang preparasyon sa seguridad alang sa Sinulog ug IEC, mihimo sila og dugang adjustments aron mas mapahugtan ang seguridad nunot sa nahitabo didto sa Indonesia.

Sa pagkakaron ang sakop sa Regional Intelligence Division sa kapulisan dinhi sa Sugbo naghimo og makuting pagsubay sa mga impormasyon nga ilang nadawat bahin sa mga hulga.

Si Lawas nanawagan sa katawhan nga magpabilin nga makalmahon ug tabangan ang kapulisan pinaagi sa pag-report gilayon kung adunay mga kadudahang mabantayan sa ilang palibot.

Gani makita karon diha sa nagkadaiyang bahin sa siyudad ang mga tarpaulin nga nag-awhag sa publiko pagsumbong dayon sa kapolisan bisan sa gamay lang nga pagduda nga ilang maobserbahan sa palibot.

Sa pagkakaron si Lawas mipasabot nga wala pa’y nadawat ang kapulisan nga hulga sa seguridad.

Upat ka libo ka mga pulis ang ipakatap sa palibot sa siyudad sa Sugbo atol sa maong mga kalihokan, aduna pay suporta gikan sa Central Command sa Armed Forces of the Philippines ug uban pang force multipliers nga ipakatap.

Matud pa ni Lawas, si Chief Supt. Manuel Gaerlan mimando nga kinahanglang daghang mga polis nga makita diha sa kadalanan karong mga panahona. Sa laing bahin, ang Cebu City Disaster Risk Reduction Management Council (CCDRRMC)  nakig-alayon sa kapolisan sa preparasyon sa Sinulog ug IEC aron makapangandam human sa nahitabo sa Indonesia.

Matud ni CCDRRMC head Konsehal Dave Tumulak nga gibutang karon sa full alert status ang mga rescue teams, mga barangay fire volunteers ug Bureau of Fire Protection. Gilauman nga mas daghang tawo ang mangabot sa Sugbo atol sa Sinulog nga molahos sa IEC.

Giawhag  usab ni Tumulak ang katawhan nga dili lang magsalig sa mga law enforcers angay nga sila mismo mag-amping sa kaugalingon. (Jojo Ugdol, Sheriza Mae UyEIM)(BANAT NEWS)