‘No overloading’ sa fluvial procession
CEBU, Philippines - Higpit nga gidili sa coast guard ang overloading sa mga sakyanan sa kadagatan atol unya sa fluvial procession sa kapistahan sa Senior Santo Niño karong Sabado sa buntag.
Si Cebu Coast Guard station commander Agapito Bibat nipadayag nga kini aron malikayan ang aksidente.
Dili usab paapilon ang mga sakyanan sa kadagatan nga wala marehistro sa Maritime Industry Authority.
Lakip sa gidili ang ilegal nga drugas ug ilimnong makahubog, pagbuhi og mga balloons ug pagpaboto og kuwites.
Si Bibat niingon nga ang organizing committee kinahanglan usab nga mokuha og permit alang sa maong kalihukan isip pagsunod sa mando sa ila labaw’ng buhatan.
Kini ang unang higayon nga gikinahanglan ang permit human sa pipila na ka tuig nga pagpahigayon sa fluvial procession.
Alas 3 sa kadlawon himoon ang farewell mass nga dumalahon ni Fr. Jonas Mejares sa Saint Joseph National Shrine sa Dakbayan sa Mandaue diin bilaran sugod ugma human sa Traslacion. Human sa misa isunod ang foot procession paingon sa Ouano Wharf sa Looc, Mandaue.
Magsugod ang fluvial procession alas 6 sa buntag sa Sabado sa Mactan Channel paingon sa Pier 1 sa Dakbayan sa Sugbo. (BANAT NEWS)
- Latest
