Obispo pabor sa street party
CEBU, Philippines - Pagwagtang sa street party atol sa Sinulog Grand Parade nakaangkon og nagkadaiyang reaksyon sa mga Sugbuanon.
Matud ni Prince Guian delos Reyes, Sugbuanong youth leader, nga dili siya pabor nga wagtangon ang street party apan kinahanglan lang i-regulate ug adunay tukma nga lugar kung asa ipahimutang ug kinahanglan nga desente usab ang kalihukan.
Sumala pa ni delos Reyes nga angay hinumduman nga relihiyoso ang kalihukan sanglit kapistahan kini sa Balaang Bata nga si Senior Sto. Niño.
Samtang si Gwenith Jill Rabor, kanhi reporter sa pamantalaan, nipadayag nga pabor siya nga wagtangon ang street party aron hapsay ang kasaulogan.
Dugang ni Rabor nga kanhi partygoer siya sa Sinulog ug sayud siya kung unsa ang binuhatan sa mga tawo ilabi na kung kini mangahubog na kay makahatag gyud og kagubot.
Si Auxiliary Bishop Oscar Florencio sa iyang bahin, ang team moderator sa Sto. Rosario Parish, nibutyag nga mahimo ra nga dili wagtangon ang street party apan i-regulate lang tungod kay laay usab ang sige og paabot sa usa ka kalihukan kung wala’y kalingawan.
Sumala pa ni Florencio nga mahimo ra nga magkalingawan basta dili lang palabihan aron dili mawagtang ang ka solemne sa usa ka kalihukan.
Gipadayag ni Florencio nga sayud siya nga ang katawhan kahibalo kung unsa’y sakto o makadaut hinungdan nga awhag niya nga dili lang gyud magpalabi sa gibati. (BANAT NEWS)
- Latest
